İşğalli mahkeme, Sevastopoldan (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addan) qız ve anası içün 12 yıllıq apis cezasını deñiştirmemege qarar aldı. Oleksandra ve Viktoriya Strilets işğalciler tarafından "devlet hainligi"nde qabaatlandı.
"Qırım esnası" bunı bildirdi.
"Soçideki Üçünci umumiy yurisdiktsiya apellâtsiya mahkemesi, Ukrayina mahsus hızmetlerine Qara deñiz flotunıñ gemileri aqqında malümat bergenleri içün devlet hainligi maddesine binaen mahküm etilgen Oleksandra ve Viktoriya Striletsniñ apellâtsiya şikâyetini baqmağa bitirdi. Mahkeme ükmüni deñiştirmedi", — dep haberde qayd etildi.
Uquq qorçalayıcılarnıñ qayd etkenlerine köre, birinci instantsiya mahkemesinde dava baqılğanda, mahkeme ve ükümniñ ilân etilmesi qapalı rejimde olıp keçkeni sebebinden, açıqlıq aqqınıñ bozuluvı qayd etildi.
"Mahkemeniñ saytında qabaatlanğanlarnıñ malümatı gizlengen edi, bu da mahkeme oturışınıñ künü ve vaqtını ögrenmege qıyınlaştıra edi. Bundan da ğayrı, dava baqıluvınıñ tezligi diqqatqa lâyıq — eki qabaatlanğan şahısqa qarşı dava malümatları tek bir oturışta baqıldı, ve mahkeme ükümni qabul etmek içün üç saatten çoq vaqıt sarf etmedi. Böyle tezlik, mahkemeci davanıñ qararını evelden qabul etkenini köstere bile", — dep "Qırım esnası" yazdı.
Bundan ğayrı, Viktoriya ve Oleksandra Strilets adaletli mahkeme imkânlarından marum etildi, çünki Ukrayinanen alâqalarında qabaatlav boyunca cinaiy davanı Altay ülkesinden işğal etilgen Sevastopolğa (Aqyarğa) avuştırılğan Rusiye mahkemecisi Danil Zemlükov baqqan edi.
"Devletlerara silâlı zıddiyetni köz ögüne alıp, Rusiye mahkemecisiniñ tarafsızlığı ve taraf tutmaması şübeler doğura. Aynı şübelerni Rusiye mahkemecisi Alöna Udodnıñ istinaf şikâyetiniñ baqıluvı da doğura", — dep resurs bildirdi.
Sevastopoldan (Aqyardan) ana ve qızı, 2025 senesi arman ayında devlet hainliginde qabaatlanıp, işğalciler tarafından müstemlekede 12 yılğa üküm etildi.
Bundan evel "Pervıy otdel" uquq qorçalayıcı leyhası bildirdi ki, mahküm etilgen Qırım sakini Oleksandra Striletsniñ qızı yardımğa muhtac — orta küz ayına qadar altı aylıq qızçıq doğğanından berli reanimatsiyada edi ve öz başına nefes alıp olamay edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
