Maküm etilgen Qırım sakini Oleksandra Striletsniñ balası yardımğa muhtac — altı aylıq qızçıq doğğanından berli reanimatsiyada buluna ve öz başına nefes alıp olamay. İşğalciler onıñ anası ve qartanasını arbiy obyektlerniñ fotoresimlerini çekkenlerinde qabaatlap, müstemlekede 12 yılğa maküm ettiler.
"Pervıy otdel" uquq qorçalayıcı leyhası bunı bildirdi.
"Menim kiçik qızı doğğanda 530 gramm ağırlığında edi. Doğğan kününden başlap o, reanimatsiyada buluna. Striletsniñ aytqanına köre, qızçıq öz başına nefes alıp olamay. "Striletsniñ aqayı, Maksım, küçük qızı içün ilâc, aşayt ve bala bezlerine ayda tahminen 30 biñ ruble masraf ete", — dep "Pervıy otdel" yazdı ve qorantası maddiy yardımğa muhtac ve para toplavını ilân etti.
Hatırlatamız ki, Sevastopoldan (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addan) ana ve qızı işğalciler tarafından devlet hainliginde qabaatlanıp, müstemlekede 12 yılğa üküm etildi. Rusiye nezareti altındaki taqiqatnıñ malümatına köre, olar Rusiye arbiy obyektlerini fotoğa çeke ve fotolarnı Ukrayina tarafına bere ediler.
"Qıznıñ para içün Ukrayina temsilcilerinen gizli işbirlik yapmağa qarar alğanı belli oldı. Bu faaliyetke o, anasını da celp etti. 2023 senesi ilk küz ayında anası tarafından yapılğan Rusiye arbiy obyektleriniñ fotoresimlerini Ukrayina istihbaratı kontrol etken ağdaki resursqa berdi", — dep haberde qayd etildi.
Qadınlarnı umumiy rejimli tüzetüv müstemlekesinde ceza çekecekler, dep Sevastopol (Aqyar) prokurorlığı bildirdi.
Daa evel Avropa insan aqları mahkemesi Rusiyeni söz serbestliginiñ sistematik basqısı ve Ukrayinağa qarşı cenkni tenqit etkeni içün insanlarnıñ taqip etilmesinde qabaatlı tanıdı. Avropa insan aqları mahkemesi ayrı qayd etti ki, işğalli Qırım mahkemeleriniñ bütün "qararları" qanunsızdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
