Qara qış ayınıñ 16-nda Lvivde qırımlı ressam ve siyasiy mabüs Boğdan Zizağa bağışlanğan "Yaşasız içün. For Orphan" umum ukrayin bediiy kampaniyası çerçivesinde soqaq sanatı yaratıldı.
"QırımSOS" uquq qoruyıcı teşkilâtı bu aqqında bildire.
Teşebbüsten haber etilgeni kibi, divar resmi işğalge qarşı tirenüvniñ timsali ve Qırım siyasiy mabüsleriniñ taqdiri aqqında hatırlatıcı oldı. Eserniñ merkezinde — Qırımnıñ metaforasına çevirilgen Zizanıñ eserleri esasında yaratılğan öksüz bala obrazı: Ukrayinadan ayırılğan, amma qırılmaz.
Qırımtatar asıllı ressam, soqaq sanatınıñ müellifi, Lviv bu iş içün hususiy bir yer olğanını qayd etti.
"Lviv birdemlikni o qadar tabiiy ve teren köstere ki, Boğdan Ziza içün yapılğan soqaq sanatı bu yerde bir işaret degil de, şeerniñ ruhı kibi körüne. Bu serbestliknen, küçlü ğayeler peyda ola", — o dedi.
Ressamnıñ aytqanına köre, esirlikte bile ressamnıñ ikâyesi yaşay:
"Onıñ apishanede yazğan şiirini oquğanda yañı bir aydınlıqnen añlay: Qırım — Ukrayinadır. Boğdan — bu Ukrayina. Onıñ sözleri — qıyınlıq ve bozulmazlıq, ışıq ve qapalı olmağan aqiqat. . . Yorğunlıq ya da ümütsizlik duyğularımnı bastırğanda, Boğdan ve diger siyasiy mabüslerni hatırlayım. Olarnıñ ikâyeleri insan ruhunıñ küçüni hatırlata. Hatırlağanımız ve aytqanımız kibi, olar özleri degil", — dep soqaq sanatınıñ müellifi qayd etti.
Aynı şu künü Lvivde leyhanıñ müellifi ile "Cenübiy" Medeniy Habında körüşüv olıp keçti. Qara qış ayınıñ soñuna qadar "Yetimler içün" sergisini Pototskıy sarayında ve Lviv vilâyetiniñ saraylarında körmek mümkün.
Kampaniya Ukrayinanıñ on şeerini qaplap ala ve çetelde de bulunıp, ukrayin siyasiy mabüsleriniñ mevzularına sanat vastasınen diqqat celp ete.
Bundan evel, arbiy narazılıq içün 15 yıl sert rejimli koloniyada qalmasına üküm etilgen siyasiy mabüs Boğdan Ziza Rusiye vatandaşlığından vazgeçken edi. O, Rostovdaki mahkeme oturışuvında Rusiye pasportını "qaçırmağa" istemeycegini açıqtan bildirdi.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
