Keriç sakinleri asfalt zavodından çıqqan himiyeviy tumandan zarar köreler

İşğal etilgen Qırımda Keriç sakinleri soñki aylarda asfalt zavodınıñ avağa kirli himiyeviy tuman çıqarğanından şikâyet eteler. Olarnıñ aytqanlarına köre, soqaqta bulunmaq sağlıq içün telükeli ola. Semptomları arasında baş ağrısı, yürek bulanuvı ve baş aylanuvı.

Qara qış ayınıñ 12-nde areket Telegram kanalında bunı bildirdi.

"İnsanlar, soqaqlarda nefes alıp olamağanlarını aytalar: büyükler ve balalarnıñ başları ağırmağa ve aylanmağa, yürekleri bulanmağa başlay. "Sarı şerit" areketiniñ faalcileriniñ bildirgenine köre, mesele bir ya da eki ay devam etmey. Şikâyetler muntazam sürette berile, amma bir netice yoq", — dep haberde qayd etildi.

Faalcilerniñ qayd etkenlerine köre, yerli işğalli memuriyet Keriç sakinleriniñ muracaatlarını tamamen körmemezlikke ura ya da resmiy cevaplarnen sıñırlana.

Hatırlatamız ki, 2025 senesi orta küz ayınıñ başında Keriç rayonınıñ Şçolkine şeerinde sakinler işğalli uquq qorçalayıcılarğa şirketten şikâyet etken ediler. Tibbiy çöplükniñ qullanuvı şeerde himiyalarnıñ keskin qoqusını taşıy.

Bundan ğayrı, Aqtaş gölü yanında yerleşken zavod, gaz temizlevden çıqqan çöplükni yanındaki topraqqa qoya, bu ise topraqnı, yerastı suvlarnı kirlete. O, Aqtaş gölü, Azaq deñizi ve Qazan Tip tabiat qoruğı içün telüke ola bile.

İşğalciler ekinci kere bu şirketke qarşı tabiat qoruv qanunlarını bozğanı sebebinden cinaiy dava açtılar.

Bundan evel "Sarı şerit" areketiniñ bildirgenine köre, işğal etilgen Qırımnıñ Keriç şeerinde suv keyfiyetinden şikâyet eteler: kranlardan yaramay qoqunen sarı suv aqa. İşğalciler, suv içile bilir olğanını aytalar.

Читати ще