Mariuş Kaminski işğalciler tarafından "Hizb ut-Tahrir davası"nda qanunsız şekilde 17 yılğa mahküm etilgen 62 yaşındaki Qırım siyasiy mabüsi Azamat Eyüpovnıñ mentorı oldı.
Mariuş Kaminski — Avropa parlamentiniñ azası, sabıq Poloniya içki işler naziri. O, siyasiy mabüsniñ mentorılığı aqqında X içtimaiy ağınıñ öz saifesinde bildirdi.
"Azamat Eyüpov — yıllardır Kremlniñ siyasetine qarşı narazılıq bildirgen cesür qırımtatar. Sovetler Birliginde taqip etilgen edi ve alâ daa taqip etile. Azamatqa birdemlik köstermek içün qoltutuv sözlerini ve apishanege aş paketini yolladım. Ümüt etem ki, bu yardım kampaniyası oña ve Rusiye apishanelerinde tutulğan muhalifet erbaplarına azatlıqqa çıqmağa yardım eter. Yañı yıl olarğa azatlıq ketirsin", — dep siyasetçi yazdı.
Keçken sene orta küz ayında Azamat Eyğpov, eki kün devamında artqan qan basımı sebebinden hastahanege alındı. Onıñ apayı Gülnara Eyüpova "Qırım birdemligi"ne bunı bildirdi.
Onıñ aytqanına köre, basqı artqan eki kün keçken soñ, Yuqarı Ural müstemlekesiniñ apishane ekimi acele yardım çağırıp, Eyüpovnı hastahanege baqmaq içün yollağanını bildirdi. Azamat Eyüpov qorantasınen subetleşip, beşinci insult keçirgeninden qorqqanını bildirdi ve ekimlerden teşkerüv keçirmege ve adekvat tedaviylevni tayinlemege talap ete.
Apiske alınğanından berli Eyüpov dört işemik insult keçirdi. 2022 senesi siyasiy mabüs Ruslan Süleymanov onıñ alı fenalaşqanını bildirdi — onıñ aytqanına köre, adam özü areket etip olamay edi. Advokat Emil Kurbedinovnıñ muracaat etkeni mustaqil ekimler işemik insult diagnozını qoydılar ve acele hastahanege yatqızılmasını talap ettiler.
İmayeciniñ izolâtor memuriyetine defalarca muracaat etkenine baqmadan, oña yalıñız minimal tedaviylev berile ve osteohondroz diagnozı qoyula. Tek soñ advokat qorantasınıñ parasını qullanıp, onıñ yüreginiñ ekografiyasını ve başınıñ mıqnatis rezonans tomografiyasını yaptırdı.
Keçken sene belli oldı ki, Yuqarı Ural apishanesinde siyasiy mabüs kerekli tibbiy yardımnı körmedi. O, kompleks teşkerüv ve nevrolog mesleatına muhtac edi, amma müstemleke memuriyeti onıñ muracaatlarına cevap bermedi.
Ukrayinada uquqçı mentorlığı teşebbüsi — Ukrayina prezidentiniñ Qırım MCdeki temsilciligi ve Tış işler nazirligi tarafından başlatılğan bir leyha, dünyada Qırımdaki vaziyetke diqqat celp etmek ve insan aqları oğrunda küreşni ve qanunsız tutulğan ukrayinlerniñ, hususan qırımtatarlarnıñ azat etilmesini desteklemek içün belli halqara şahıslarnı (siyasiy erbaplar, uquq qoralayıcılarnı) ukrayin siyasiy mabüslerinen, uquq qorçalayıcılar ve faalcilernen birleştire.
Azamat Eyüpov aqqında ne bilemiz
2021 senesi kiçik aynıñ 17-sinde Qarasuvbazarda kütleviy tintüvler vaqtında qırımtatar adamı tutuldı.
Oña RF CQniñ 205.5. maddesiniñ birinci qısmını (terrorcılıq faaliyetini teşkil etüv) berdiler ve RFda yasa etilgen, amma dünyanıñ çoq ülkesinde, şu cümleden Ukrainada, serbest şekilde areket etken "Hizb ut-Tahrir" islâm siyasiy fırqasına ait olmaqta qabaatlaylar.
2022 senesi oraq ayında Rostov-na-Donudaki Cenübiy bölge arbiy makemesi, Eyüpovnıñ ağır sağlık alını esapqa almadı ve 17 senege maküm etti. Siyasiy mabüs, birinci üç sene epishanede geçirmeli. Apellâtsiya makemesi, bu qararnı tanıdı.
Qırımtatar adamını tibbiy baqmaları içün advokatı Emil Kurbedinov, taiqat izolâtorına hitap etti. Feldşer, osteohondroz diagnozı berdi ve asğariy tedaviylevnen kameraya qaytardı.
2023 senesi oraq ayında aqrabalarınıñ parasınen şahsiy ekimler Eyüpovnı baqtılar, onıñ qorçalayıcısı buna irişmege ıntıla edi. Mustaqil ekimler qayd ettiler ki, SİZOda maznun dört koronar qap krizini yaşadı ve acelen hastahanege yatmalı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
