17 yılğa mahküm etilgen 62 yaşlı qırımlı siyasiy mabüs Azamat Eyüpov qan basımı ardı-sıra eki kün devam etken keskin koterilmesi sebebinden hastahanege tüşti.
Qırım birdemlikke onıñ apayı Gülnara Eyüpova bu aqqında bildirdi.
Onıñ aytqanına köre, qan basımı yükselgen soñ tek eki kün keçken soñ, Verhneuralsk koloniyasındaki apishane ekimi Eyüpovnı hastahanege teşkermek içün yöllaycağını aytıp, tez yardım çağırdı. Aynı vaqıtta, apayınıñ aytqanına köre, aqay daa teşkerilmegen ve tedaviylenmegen.
"O şimdi hastahanede, özüni yaramay duya. Bazar künü, ekim ayınıñ 19-da, çağıruv vaqtında onı teşkermegen ediler. Belki bu bazarertesinden berli bir şeyler deñişti", — Gulnara Eyüpova dedi.
Azamat Eyüpov qorantasınen olğan subette beşinci insulttan qorqqanını ayttı ve ekimlerniñ teşkerüv keçirip, normal tedaviy yazmalarını talap etti.
Eyüpov apske alınğanından berli endi dört kere işemik insult keçirdi. 2022 senesi daa siyasiy mabüs Ruslan Suleymanov öz alınıñ bozulğanı aqqında haber etti — onıñ aytqanına köre, adam mustaqil areket etip olamay edi. Mustaqil ekimler, advokat Emil Kurbedinov muracaat ettiler, soñ işemik insult diagnozı qoydılar ve tez vaqıtta hastahanege erleştirilmekni talap ettiler.
"Onıñ sağ eli qısılıp olamay, laf etip başlağanda, tili biraz qarışqanını koresiñ. Onıñ mimikası da başqaca çalışa", — dep advokat Kurbedinov ayttı.
Mudafaacı apishane idaresine defalarca muracaat etse de, oña tek minimal tedaviy kösterildi ve osteohondroz diagnozı qoyüldi. Soñ advokat qoranta esabına yürekniñ UZİ-sini ve başnıñ MRT-sini yaptırmağa muvafaqiyet oldı.
Keçken sene belli oldı ki, Verhneuralsk apishanesindeki siyasiy mabüs iç bir vaqıt kerekli tibbiy yardımnı almadı. Oña er taraflama teşkerüv ve nevrolognen mesleatlaşuv kerek edi, lâkin koloniya idaresi onıñ ricalarına cevap bermedi.
Azamat Eyüpov aqqında ne bilemiz:
- 2021 senesi kiçik aynıñ 17-sinde Qarasuvbazarda kütleviy tintüvler vaqtında qırımtatar adamı tutuldı.
- Oña RF CQniñ 205.5. maddesiniñ birinci qısmını (terrorcılıq faaliyetini teşkil etüv) berdiler ve RFda yasa etilgen, amma dünyanıñ çoq ülkesinde, şu cümleden Ukrainada, serbest şekilde areket etken "Hizb ut-Tahrir" islâm siyasiy fırqasına ait olmaqta qabaatlaylar.
- 2022 senesi oraq ayında Rostov-na-Donudaki Cenübiy bölge arbiy makemesi, Eyüpovnıñ ağır sağlık alını esapqa almadı ve 17 senege maküm etti. Siyasiy mabüs, birinci üç sene epishanede geçirmeli. Apellâtsiya makemesi, bu qararnı tanıdı.
- Qırımtatar adamını tibbiy baqmaları içün advokatı Emil Kurbedinov, taiqat izolâtorına hitap etti. Feldşer, osteohondroz diagnozı berdi ve asğariy tedaviylevnen kameraya qaytardı.
- 2023 senesi oraq ayında aqrabalarınıñ parasınen şahsiy ekimler Eyüpovnı baqtılar, onıñ qorçalayıcısı buna irişmege ıntıla edi. Mustaqil ekimler qayd ettiler ki, SİZOda maznun dört koronar qap krizini yaşadı ve acelen hastahanege yatmalı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basqı arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
