Rusiyege boysunğan Qırım akimiyeti 2023 senesi boş ayda yarımadanıñ cenübiy yalısında "asır fırtınası"ndan zarar körgen yalı kenarlarınıñ tamirini ilân etti. İşlerni Yalta civarındaki "Livadiya" şifahanesi rayonında keçirmege planlaştıralar.
Mütenasip emirni yarımadanıñ işğalli yolbaşçısı Sergey Aksönov imzaladı.
"Cenübiy paytaht" şirketini añlaşma boyunca yekâne mütehassıs olaraq belgilediler. Añlaşmanıñ umumiy fiyatı 924,1 mln ruble (495 mln ğrıvnâ). Bu miqdardan 25,6 mln ruble (13 mln ğrıvnâ) leyha-qıdırma işlerine, daa 898,5 mln ruble (480 mln ğrıvnâ) — qurucılıq-montaj işlerine ayırıldı. Tamir işleri 2028 senesi ilk qış ayınıñ 1-ne qadar yekünlenilecek.
Bu, şirketniñ bu kibi iş içün ilk añlaşması degil. Şirket 2021 senesi teşkil etildi ve muntazam sürette Rusiye kontrolindeki Qırım akimiyetinden añlaşmalarnı ala. Hususan, keçken sene ilk qış ayına qadar şirket Qırımnıñ Cenübiy yalısında "Rossiya" şifahanesinden "Çornomorya" şifahanesine qadar 700 million rublelik sıñır qoruv sızığınıñ tamirini yapacaq edi.
2024 senesi aynı bu şirketnen Qırımnıñ cenübinde yalı kenarlarını pekitüv inşaatlarınıñ tamir etilmesi içün daa 11 devlet añlaşması imzalandı.
Hatırlatamız ki, 2023 senesi boş ayda küçlü furtuna Qırımnı sarıp aldı. Fırtına yelleri sebebinden suv dalğaları bir qaç metrge köterildi, beton yapılarnı yıqtı, yalı kenarlarını, yollarnı ve mesken evlerni suv bastı. Rusiye kontrolindeki akimiyet zarar körgen obyektlerni 2024 senesine qadar tamir etmege vade etti, amma büyük deñişmeler olmadı. Turistler, viraneler arasında raatlanmağa mecbur olğanlarından defalarca şikâyet ete ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
