İşğal etilgen Qırımda mobil internet uzun müddetke bütünley söndürile bile. Bu arada, internet provayderleri çalışmağa devam etecek.
Yarımadanıñ içki siyaset, malümat ve alâqalar nazirligi bunı bildirdi.
Yerli sakinler de Suspilne Qırımğa internet bağınıñ bozulğanını tasdıqladılar.
"Tünevin ana-babamnen bağlandım ve WhatsApp pek fena oldı, pek yaramay çalıştı, biz bir daqqada bir söz eşittik. Bizler, er vaqıt olğanı kibi, bağ bozulğanını, İnternetniñ bir de bir meselesi olğanını tüşündik. Babam, Facebook vastasınen bağlanmağa teklif etti. O, messencer vastasınen telefon etti. Facebook yasaq etilgen olsa da, Facebook messengerinden bazıda telefon etmek mümkün", — dep Qırım sakini bildirdi.
Qırım sakinlerinden biri, mobil messencerlerniñ stabil olmağanını tasdıqlay.
"Video vastasınen laf etmek imkânsız, WhatsApp ve Telegram 10-uncı sefer bağlana, amma laf etmek imkânsız, keçiküv pek büyük", — dep bildirdi o.
"Sarı şerit" qarşılıq areketiniñ malümatına köre, söndürüvler aftadan çoq devam ete bile. İşğalli akimiyet bağnı bir qaç künge sıñırlağan edi, ve Wi-Fi provayderleri Rusiye qurulışlarınıñ tam nezareti altında qala, bu ise ağğa irişimni yavaşlatmağa imkân bere.
"Sarı şerit" areketiniñ faalcisi Suspilne Qırımğa işğalciler Qırım sakinlerini mobil internetsiz yañı "normallik"ke azırlay, dep ayttı.
“Ebet, Rusiye matbuat vastalarınıñ bu tevsiyelerini kördik — sanki olar Qırım sakinlerini İnternetsiz yaşamağa azırlaylar. Olarnı bir qaç saatke ya da bir qaç künge söndüre bileler, ve, olar yazğanına köre, yerli akimiyetniñ haberi olmadan. İnsanlarğa yaqınlarınen bağlanmaq içün mesaclarsız qonuşmağa tevsiye eteler", — dep qayd etti o.
Başqa bir iştirakçi telefon bağınıñ kesilüvi ve resmiy tenbiyelev aqqında bildirdi.
“Men Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) civarındaki köyde yaşayım ve yarım yıldan berli cep telefonı ile bağlı problemler olğanını körem. Meselâ, kün ortasında üç saat devamında bağ yoq edi — ve böyle devamlı, er kün böyle ola. Bunıñ sebebini kimse añlatmay, amma yerli "Volna" operatorı SMS yollap, bunı "telükesizlik maqsadınen" yapqanını bildire. Qayd etilgenine köre, bu, REB qullanuvınıñ neticesidir. Mobil internet de sıq-sıq yoq ola, ve bu söndüricilerden degil — ağnıñ özü pek yaramay çalışa", — dedi o.
Ukrayina tış istihbarat hızmetiniñ malümatına köre, yalıñız 2025 senesi oraq ayında Rusiyede rekord 2099 internet kesilüvi qayd etildi, olarnıñ çoqusı işğal etilgen Qırımda oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
