2025 senesiniñ başından işğalciler Rusiye halqlarınıñ tarihı ve medeniyeti abideleri tek devlet siciline "Qırım medeniy ve arheologik mirası"nıñ 79 obyektini kirsettiler.
İlk qış ayınıñ 17-nde işğalli Qırım yolbaşçısı Sergey Aksönov Telegramda bunı bildirdi.
"43 medeniy miras obyektiniñ saqlanuv işlerini keçirmek içün emir berildi, bunıñ kibi işlerniñ keçirilmesine 113 izin berildi", — dep qayd etti o.
Aksönovnıñ aytqanına köre, yañı medeniy miras abideleri arasında — XIX asırnıñ ekinci yarısında satıcı A.İ. Françeskonıñ Keriçteki evi ve uçucı F.F. Gerasimovnıñ Qırım tabiat qoruğınıñ toprağındaki hatıra abidesidir.
Sicilge kirsetilgen arheologik obyektler arasında Partenit qasabasındaki Aligor qayalarında yerleşken qadimiy ibadethane ve şeer qalımtıları, Bağçasaray rayonındaki Qaralez mudafaa divarı bar, dep işğalci qoştı.
Hatırlatamız ki, Qırım — Rusiye tarafından işğal etilgen Ukrayina toprağıdır, şunıñ içün Rusiye Federatsiyasınıñ medeniy miras statusını deñiştirmek, izin bermek ya da Ukrayina razılığı olmadan restavratsiya işlerini yapmaq ıntıluvları qanunsız ve halqara uquqnı boza.
Şu cümleden, Rusiye arheologı Aleksandr Butâgin Qırımda qanunsız şekilde qazılğanı içün Poloniyada şübheli sayılıp apiske alındı.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: Qırımdaki qazmalarda iştirak etken umumen yedi şübelengen arasında em Rusiye, em de Ukrayina vatandaşları bar.
Meselâ, bu sene UHH Rusiye arheologı Vladimir Tolstikovnı qıdıruvğa ilân etti. O, zemaneviy Keriçte yerleşken qadimiy yunan şeeri Pantikapey yerinde onlarca yıl devamında qazma işlerinen oğraşa edi.
Şimdi Ukrayina açıq menbalar vastasınen qanunsız qazmalarnı, qurucılıqnı ve Hansaray kibi "restavratsiyalar"nı qayd ete. Anda qadimiy kirametlerni zemaneviy kirametlernen deñiştireler. Uydu resimleri ve Qırımdan ketken mütehassıslarnıñ malümatları da yardım ete.
Malümat milliy ve halqara institutlarğa, şu cümleden UNESCO ve Halqara cinaiy mahkemege berile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
