Ukrayin "Vikipediyasında" 2026 senesi ilk qış ayınıñ 8-nden qara qış ayınıñ 11-ne qadar "Vikipediyada belli(mey) qadınlar" marafonı devam etecek. Teşebbüsniñ maqsadı — ukrayin qadınları aqqında maqalelerniñ sayısını arttırmaq. Bu sene namzetler arasında — "Qırımtatar qadınları", "Qaraim qadınları", "Ukrayina qorçalayıcıları", "Ukrayina jurnalistleri", "Ukrayina pedagogları", "Ukrayina yazıcıları", "Polar qadınları", em de "Nobel mukâfatını almağa istegen, amma almağan qadınlar".
Vikipediya saifesinde bu aqqında aytıla.
"Qadınlarnıñ tercimeialları ve muvafaqiyetleri Vikipediyada adet üzre eksik kösterilgen: misal içün, ukrayin tilli bölükte 280 biñden ziyade tercimeial maqaleleriniñ tek 18,04% qadınlarnen bağlı, keçken sene bu köstergiç 17,99% edi. İngliz tilli Vikipediyada bu köstergiç 20,13%, arap tilinde 16,45%, ispan tilinde 23,74%", — dep haberde aytıla.
Teşkilâtçılarnıñ qayd etkenine köre, marafonda er kes iştirak ete bile — tek Vikipediyada qayd olmaq kerek.
İştirak etmek içün, leyha mevzusında mümkün olğanı qadar çoq maqale yaratmaq ya da yahşılaştırmaq kerek. Mevzular, mütenasip saifede teklif etilgen cedvelden saylana ya da öz başına belgilene bile — mevzu ve yarış qaidelerine uyğun olsa, dep aytıla "Vikipediya" saytında.
Hatırlatamız, (Vikipediyada) belli olmağan qadınlar" er yıllıq kampaniyasıdır, keçken sene marafon 2024 senesi ilk qış ayınıñ 10-ndan 2025 senesi qara qış ayınıñ 10-na qadar devam etti. Umumen, bu vaqıt devamında 58 erkek ve qadın iştirakçi 467 maqaleni baqıp çıqtı.
Yarışnı Ukrayina Prezidentiniñ Qırım Muhtar Cumhuriyetindeki Temsilciligi, Medyadaki qadınlar teşkilâtı, Ukrayina Pedagogik müzeyi, Reading Studios Foundation, "Qızlar yaratalar" teşebbüsi, Milliy Antarktika ilmiy merkezi, "Ukrayina qarayları birligi" teşkilâtı ile keçire.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
