İşğal etilgen Qırımda işğalciler Qırım siyasiy mabüsleriniñ advokatlar gruppasınıñ ofisini tintmege bitirdiler. Tintüv işğal etilgen Qırım Yuqarı mahkemesiniñ qararları esasında keçirildi. Vesiqada aytılğanı kibi, advokatlar terroristik teşkilâtnıñ faaliyetini teşkil etmekte, terroristik faaliyetke yardım etmekte ve bergi tölememekte iştirak ete bileler.
"Qırım birdemligi"niñ Suspilne Qırımğa bildirilgene köre, tintüvler Kıyiv vaqtına köre tahminen saat 11:30-tan saat 15:00-ke qadar devam etti.
Hatırlatamız ki, "E" işğalli merkeziniñ hadimleri advokatlar— Edem Semedlâyev, Emil Kurbedinov, adliyeciler — Nazim Şeyhmambetov, Elvina Semedlâyeva, Rustem Kamilev ve Lilâ Gemeciniñ ofisine keldiler .
Nazim Şeyhmambetovnıñ "Qırım birdemligi"ne aytqanına köre, tintüvler vaqtında advokat vesiqaları alındı.
"Bizge cep telefonlarını qullanmağa yasaq ettiler, ofislerimizden çıqmağa yasaq ettiler. İçinde biz sıñırsız areket ete bilir edik. Sıñırlavlar yalıñız telefon qullanuvı ve zaldan çıqmamaqnen bağlı edi. Protokol tizildi. Bu tedbirniñ keçirilmesinde olğan, bizim fikirimizce, bozuvlar aqqında yazıp, öz fikirimizni bildirdik. Tehnikamıznı teşkerdiler — er birimizniñ cep telefonlarını teşkerdiler", — dep o añlattı.
Teşkilâtnıñ bildirgenine köre, tintüv içün berilgen ruhsetnamede "advokatlar Rusiye Federatsiyası Ceza qanunnamesiniñ 205.5-nci, 205.1-nci, 199-ncı maddelerine istinaden qanunsız areketlerde iştirak ete bileler". Bular — terroristik teşkilâtnıñ faaliyetini teşkil etüv, terroristik faaliyetke yardım etüv ve bergi tölememeknen bağlı maddelerdir.
Advokat Emil Kurbedinovnıñ aytqanına köre, quvetçiler ofiste ne qıdırğanlarını bilmegen kibi köründiler.
"Men ve daa bir qaç adliyeci "terroristik faaliyeti"nde şübheli sayılğanımız aqqında yazılğan edi. Ve bu sebepten advokatlarımıznıñ vesiqalarını qıdırıp başladılar. Men mantıqnı añlatmağa rica etkende vesiqalarıız ve adliyecilik faaliyetimizniñ manası ne olğanını kimse bir şey añlatıp olamadı. Bir qaç añlaşmanı aldılar, bergi tölevleri aqqında bir şeyler añlattılar, añlamağan bir şeyler ayttılar. Tamam, bu bir laf olsa da, amma belli ki, bu daa bir qorquzuv, bir şey tapmaq ıntıluvı ola bilir. Biz cinayetçi olsa edik, ne qıdırğanlarını añlar edik, öyle degilmi? Bundan da ğayrı, AQMAşırıcılıqnen küreş merkeziniñ hadimleri men añlatmayım dep ıncındılar. Men dedim ki, ne içün kelgeniñizni ve ne qıdırğanıñıznı bilmeyim", — dep o ayttı.
Hatırlatamız ki, Suspilneniñ canlı yayınında halq mebusı Ahtem Çiygöz ayttı ki, rusiyelilerniñ bu areketleri qırımtatarlar qırımtatar qadınlarınıñ apiske alınması sebebinden yazğan şikâyetlerinen bağlı ola bile. Onıñ aytqanına köre, yarımadada quvetçiler muntazam sürette "sadıq olmağan ealini temizleyler".
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
