İşğalciler ukrayinalı Yan Ğauptnı Krasnodar SİZOsında terrorizmde qabaatlap tutalar. Adam, işğal etilgen Qırımdan köçip kelgen Rusiye toprağında mayısnıñ 15-nde yaqaladılar.
Facebookta "Qırımtatar resurs merkezi"niñ idare reisi Eskender Bariiev bu aqqında yazdı.
"2018 senesi yigit Almaniyağa oqumağa ketti, amma 2019 senesiniñ soñunda Qırımğa, bir qaç yıldan berli qonuşqan nişanlısınıñ yanına qayttı. Qırımğa köçüvi daa bir müim sebepnen bağlı edi — Yanıñ balalıqtan berli bar olğan hastalığı, astma. Qırımğa genç adam ukrayin vesiqalarını almaq içün ketti. Rusiye vatandaşlığını almadı ve yaşağan yeri içün ruhsetnamesi bar edi", — dep Bariiev yazdı.
2024 senesi yazda onıñ qız arqadaşı, Qırımdaki telüke seviyesiniñ yükselgenini izaatlap, Rusiyeniñ Krasnodar şeerine köçmege israr etti.
"2025 senesi mayısnıñ 15-nde Yan, tintüvden soñ, kira evinde tutuldı ve memuriy ceza aldı — poliske qarşılıq köstergeni içün 2025 senesi mayısnıñ 30-na qadar 15 künlik apis cezasını aldı. O, ne olğanını añlamay edi, çünki iç bir uruşta iştirak etmegen edi, polisnen daa ziyade. Amma mayısnıñ 30-nda FSB hadimleri onı Krasnodar şeeriniñ 1-nci SİZOda qaldırdılar, cinaiy dava açtılar ve Rusiye Ceza qanunnamesiniñ 205 maddesiniñ 1-inci qısmına istinaden qabaatladılar. 2025 senesi oraq ayınıñ ortasında, Yanğa qarşı daa bir qabaatlav çıqarılğanı belli oldı — RF Ceza qanunnamesiniñ 222-nci maddesi (silâ saqlav) ve RF Ceza qanunnamesiniñ 274-nci maddesi (kompyuter malümatını ve haber-telekommunikatsiya ağlarını saqlav, işlev ya da berüv vastalarınıñ qullanuv qaidelerini bozuv)", — dep Bariiev qayd etti.
2025 senesi ilk yaz ayınıñ 25-nde Yan Rosfinmonitoringniñ "Terrorist-aşırıcılar cedveli" Rusiye federal cedveline 4396 nomerası olaraq kirsetildi.
Hatırlatamız ki, evel Eksender Bariiev bildirdi ki, arman ayında Soçi ava limanında Rusiye quvetçileri qırımtatar İbraim İbragimovnı tutıp, oña "devlet hainligi"nde qabaatlavnı bildirdiler.
Bariiev bunıñ kibi diger adise-vaqialarnı da hatırlattı. Hususan, 2022 senesi oraq ayınıñ 23-nde Rusiye quvetçileri qırımtatar Appaz Kurtametni "terrorizmni maliye etüv"de qabaatlap yaqaladılar. Tahqiqatnıñ malümatına köre, oğlan "Qırım" batalyonında hızmet etken tanışına 500 ğrıvnâ ödünç berdi. 2023 senesi çiçek ayında işğalli mahkeme onı 7 yılğa apiske aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
