Avropa Birliginiñ insan aqları mahsus temsilcisi, sabıq mudafaa, içki işler ve Felemenk baş naziriniñ muavini Kaysa Ollongren eñ genç Qırım siyasiy mabüslerinden biri — 22 yaşındaki Appaz Kurtametniñ mentorı oldı.
Boş aynıñ 3-nde Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
"O, bu yaz 23 yaşını toldurdı. Doğğan kününi qorantası ve dostlarınen beraber qayd etmek yerine, onı Rusiyeniñ Pskov vilâyetindeki sert rejimli müstemlekede keçirdi... Appaznıñ ikâyesi — Rusiyede qanunsız şekilde apiske alınğan yüzlernen diger ukrayinalınıñ ikâyeleri kibi — eşitilmeli. Appaznıñ tarafdarı olmaq — adalet, er bir insannıñ itibarı ve serbestlik aqqınıñ tarafdarıdır", — dep Ollongren qayd etti.
O, Ukrayina Tış işler nazirligi tarafından prezidentniñ QMCdeki temsilciliginiñ desteginen teşkil etilgen adliyecilik mentorlıq teşebbüsine qoşuldı.
Leyhanıñ maqsadı — dünyanıñ diqqatını Rusiye Federatsiyasında ve vaqtınca işğal etilgen topraqlarda Ukrayina vatandaşlarınıñ qanunsız tutulmasına celp etmek ve olarnıñ azatlıq ve insan aqları oğrunda küreşine qol tutmaq.
Hatırlatamız ki, bu teşebbüs çerçivesinde Appaz Kurtametke daa evel Fransiska Devis mentorlıq etken edi. O, Münhenniñ Ludwig-Maximilian Universitetinde Şarqiy ve Merkeziy-Şarqiy Avropa kafedrasınıñ dotsentidir. Ukrayina, Poloniya ve Rusiyeniñ yañı tarihınıñ tetqiq etilmesinde ihtisaslaşqan.
Hatırlatamız ki, arman ayında qırımtatarlarnıñ eñ genç siyasiy mabüsi Appaz Kurtametni eki ay içinde ekinci kere sebepsiz ŞİZOğa yerleştirdiler, dep onıñ anası Ayşe Kurtamet bildirdi.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
