Venesuelalı cinaiy davalar advokatı ve insan aqları mütehassısı Tamara Suhu Roa, advokatlıq mentorlığı teşebbüsi çerçivesinde Qırım siyasiy mabüsi İrına Ğorobtsovanıñ mentorı oldı.
Qırım uquq qorçalayıcı gruppası Facebookta bunı bildirdi.
"Tamara Suhu Roa, Venesuelada insan aqları oğrunda küreşke qoşqan emiyetinen belli, o, çoq yıl devamında siyasiy taqip, işkence ve zorbalıqqa qarşı küreşe", — dep haberde qayd etildi.
O, Ukrayina Tış işler nazirligi tarafından prezidentniñ QMCdeki temsilciliginiñ desteginen teşkil etilgen advokat mentorlığı teşebbüsine qoşuldı.
Tamara Suhu Roa teşebbüs çerçivesinde İrınağa qol tutuv sözlerini bildirdi ve işğal etilgen topraqlarda Rusiye tarafından yapılğan siyasiy taqip ve insan aqlarınıñ bozuluvı miqyasını köstermek içün onıñ ikâyesini dünyağa tarqatmaq müim olğanını qayd etti.
"Qadınlarğa qarşı zorbalıqqa qarşı halqara künü munasebetinen men Rusiyede Mordoviyadaki itibarsız apishanede tutulğan ukrayinalı siyasiy mabüs İrına Ğorobtsovanıñ azat etilmesini talap etem. Onıñ alı belli degil", — dep Tamara Suhu Roa X içtimaiy ağında yazdı.
Leyhanıñ maqsadı — dünyanıñ diqqatını Rusiye Federatsiyasında ve vaqtınca işğal etilgen topraqlarda Ukrayina vatandaşlarınıñ qanunsız tutulmasına celp etmek ve olarnıñ azatlıq ve insan aqları oğrunda küreşine qol tutmaq.
Hatırlatamız ki, İrına Ğorobtsovanıñ Rusiye mahkemesi kassatsiya şikâyetini qanaatlendirmedi — onı Mordoviyağa, Yavas köyündeki 2-nci müstemlekege etap ettiler. İşğalciler oña "casuslıq" içün 10,5 yıllıq apis cezasını berdiler.
İrına Ğorobtsova aqqında ne bilemiz
İrina Gorobtsova — İT şirketinde testçi ve cemaat faalcisidir. Herson Rusiye tarafından işğal etilgen vaqıt o, yerli hastahanege yardım ete edi: uzaq rayonlardan ekimlerni alıp kete edi, aşayt malları, ilâc ve bağlayıcı malzemelerni qıdırıp ketire edi, ayrıca Herson vilâyetiniñ uzaq meskün yerlerindeki ağır hastalarğa ilâc ketire edi. Bundan da ğayrı, Hersonda Rusiye işğaline qarşı keçirilgen barışıq toplaşuvlarına barıp, içtimaiy ağlarda fotoresimlerini derc ete edi
2022 senesi mayısnıñ 13-nde, faalciniñ doğğan künü, Hersonda İrına Ğorobtsova ve ana-babasınıñ yaşağanı çoq daireli evge Rusiye arbiy hızmetlerinde belgisiz şahıslar keldiler, evini tintip, İrınanı alıp kettiler, ana-babasına onı sorğuğa alıp ketkenlerini ayttılar. Tintüv vaqtında faalciniñ noutbukı ve cep telefonı tutıp alındı. İrınanen bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızını Qırımğa alıp ketkenlerini bildirdiler.
Tintüv vaqtında faalciniñ kompyuteri ve cep telefonı tutıp alındı. İrına ile bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızı işğal etilgen Qırımğa alıp ketilgenini bildirdiler.
2024 senesi yazda Herson vilâyetiniñ işğalli makemesi faalcige "casuslıq" davasında 10 yıl ve 6 ay apis cezasını berdi.
Apiske alınmazdan evel, Rusiyeniñ istilâsından evel, oña aqıl anevrizması diagnozı qoyulğan edi, bu ise tibbiy yardım ve nezaretke muhtac olğan bir vaziyet.
2024 senesi ilk qış ayında İrınadan, alı fenalaşqanı ve tutulğan Simferopol SİZOsında tibbiy yardımnıñ yetmemezligi aqqında aytqanı aqqında mektüp keldi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
