"Casuslıq" aqqında qanunsız qararğa qarşı kassatsiya şikâyetini baqmaq içün ruslar İrına Ğorobtsovanı Mordoviyadan Moskovağa ketirdiler. Rusiye mahkemesi 10,5 yıllıq apis cezasını deñiştirmemege qarar alğan soñ, siyasiy mabüsni Yavas qasabasındaki 2-nci müstemlekege keri etap etmege azırlaylar.
İrınanıñ babası Volodımır Ğorobtsov Qırımtatar Resurs Merkezine bu aqqında tarif etti.
"O, bu — iç bir şey yıqıp olamağan titan divar olğanını yazdı", — dep babası İriıanıñ Rusiye Yuqarı (kassatsiya) mahkemesiniñ qararına munasebeti aqqında tarif etti.
Volodımır Ğorobtsovnıñ aytqanına köre, İrınanıñ sağlıq meseleleri bar, müstemleke şaraiti ise ciddiy. Qorantası mektüpler ve posılkalar vastasınen oña qol tutmağa tırışa.
"O, bu müstemlekede şarait pek ağır olğanını yazdı. Anda qadınlar qulluqta kibi çalışalar. Anda, sanki, işkence kibi. Ayat, cennet kibi, pek sert qaideler, ağır iş. Onıñ sıq yürek atışları ve baş ağrıları sıq-sıq ola. Daa evel onıñ miyinde anevrizma tapıldı. Bu, insult telükesini yarata", — dep Volodımır tarif etti.
Hatırlatamız ki, ilk küz ayınıñ 10-nda Rusiye Yuqarı mahkemesi Herson şeerinden İrına Ğorobtsovanıñ davası boyunca kassatsiya şikâyetini baqtı. İşğalciler onı "casuslıq" aqqında sahte qabaatlavınen 10,5 yılğa üküm ettiler. Rusiye mahkemesi ükümni deñiştirmedi.
İrına Ğorobtsova aqqında ne bilemiz
İrina Gorobtsova — İT şirketinde testçi ve cemaat faalcisidir. Herson Rusiye tarafından işğal etilgen vaqıt o, yerli hastahanege yardım ete edi: uzaq rayonlardan ekimlerni alıp kete edi, aşayt malları, ilâc ve bağlayıcı malzemelerni qıdırıp ketire edi, ayrıca Herson vilâyetiniñ uzaq meskün yerlerindeki ağır hastalarğa ilâc ketire edi. Bundan da ğayrı, Hersonda Rusiye işğaline qarşı keçirilgen barışıq toplaşuvlarına barıp, içtimaiy ağlarda fotoresimlerini derc ete edi
2022 senesi mayısnıñ 13-nde, faalciniñ doğğan künü, Hersonda İrına Ğorobtsova ve ana-babasınıñ yaşağanı çoq daireli evge Rusiye arbiy hızmetlerinde belgisiz şahıslar keldiler, evini tintip, İrınanı alıp kettiler, ana-babasına onı sorğuğa alıp ketkenlerini ayttılar. Tintüv vaqtında faalciniñ noutbukı ve cep telefonı tutıp alındı. İrınanen bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızını Qırımğa alıp ketkenlerini bildirdiler.
Tintüv vaqtında faalciniñ kompyuteri ve cep telefonı tutıp alındı. İrına ile bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızı işğal etilgen Qırımğa alıp ketilgenini bildirdiler.
2024 senesi yazda Herson vilâyetiniñ işğalli makemesi faalcige "casuslıq" davasında 10 yıl ve 6 ay apis cezasını berdi.
Apiske alınmazdan evel, Rusiyeniñ istilâsından evel, oña aqıl anevrizması diagnozı qoyulğan edi, bu ise tibbiy yardım ve nezaretke muhtac olğan bir vaziyet.
2024 senesi ilk qış ayında İrınadan, alı fenalaşqanı ve tutulğan Simferopol SİZOsında tibbiy yardımnıñ yetmemezligi aqqında aytqanı aqqında mektüp keldi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
