Boş aynıñ 24-nde Qırım platformasınıñ Dörtünci parlament sammitiniñ açılışında Ukrayina Yuqarı Şurasınıñ başı Ruslan Stefançuk bildirdi ki, barışıq muzakerelerniñ esas şartlarından biri — rusiye tarafından işğal etilgen Ukrayina topraqlarınıñ er bir uquqiy statusınıñ umumiy tanılamamasıdır.
Bundan ğayrı, Stefançuknıñ sözlerine köre, mudafaa quvetleri de sıñırlanmaz.
"Aynı zamanda biz kimseniñ fizikiy, uquqiy, ahlâqiy şekilde keçemez olğanı qızıl ukrayin sıñırlarını açıq-aydın şekilde qayd etmek kerekmiz. Ukrayina topraqlarınıñ Rusiye işğaliniñ uquqiy statusı tanılamaz. Ukrayina mudafaa quvetleri de sıñırlanamaz. Ukrayinanıñ kelecek birleşmelerni saylamaq aqqına veto qoyulamaz. Er bir aqiqiy barışıq esanasınıñ pek añlayışlı temel olmalı: Ukrayina olmadan Ukrayina aqqında bir şey olmaz, Avropa olmadan Avropa aqqında bir şey olmaz. Biz asla öz tilimizden, dinimizden, milliy özdeşligimizden vazgeçmedik", — dep ayttı o.
Aynı zamanda Ruslan Stefançuknıñ aytqanına köre, Ukrayina cenkni bitirmek içün, yolbaşçılıq seviyesinde de, manalı muzakerelerge azır.
"Biz, taqımlarımıznıñ bu teklifler üzerinde çalışacağına añlaştıq. Ve tünevin bizim vekillerimiz Amerika oraqlarınen muzakerelerniñ birinci turını keçirdiler. Ve keçken aqşam Ukrayina prezidenti Volodımır Zelenskıynıñ aytqanı kibi, prezident Trampnıñ taqımınıñ bizni eşitkeni aqqında signallar bar. Ve biz aqiqiy barışıqqa doğru ketmege azırmız, biz bunı bildirip turamız", — dep o ayttı.
Prezident Volodımır Zelenskıy sammitteki çıqışında dünyağa tecavuz cenkleriniñ «normalligi»ni bitirmege areketler tek Ukrayina içün degil de, er kes içün havflı olğanını qayd etti. O, halqara qaidelerge emiyet berilmese ve sıñırlarnı zornen deñiştirmege tırışsalar, qıtanıñ ögünde turğan telükelerge diqqat çekti.
“Ukrayin Qırım platforması ve onıñ parlament pıtağı çalışmağa devam ete ve adiy bir aqiqatqa diqqat çeke: er bir halqqa ve er bir devletke ürmet köstermek, Avropada öz tarihında er vaqıttan barışıqnı saqlağan esas printsiplerni qorçalamaq kerek. Biz tecavuznı tek közge almayıp, ögge ketmek mümkün olğanı kibi yapmaq ne qadar havflı olğanını añlatmağa devam etecemiz. Ve men sizlerden rica etem: sukünette qalmañız, tarihnıñ passiv közeticileri olmañız — onıñ iştirakçileri oluñız“, — depUkrayina Prezidenti qayd etti .
Sammitni İsveçiya Riksdagınıñ spikeri Andreas Norlen açtı.
"Oz çıqışında o, ukrayin halqınıñ serbestlik küreşinde yeñilmezligini ve öz kelecegini mustaqil belgilemek aqqını qayd etti. O, İsveçiya ve Ukrayina arasındaki tarihiy birdemlikni, em de Rusiye tecavuzına qarşı turğanda birlikniñ kerekligini qayd etti. Norlen dünya oraqlarına Ukrayinağa yardım köstergeni içün teşekkür bildirdi ve prezident Volodımır Zelenskıynıñ yolbaşçılığını qayd etip, onı zemaneviy qaraman nümünesi dep adlandırdı", — dep Qırım plaforması saytında bildirildi.
"Qırım platforması" saytınıñ bildirgenine köre, bu yılnıñ sammitiniñ maqsadı — halqara oraqlarnı Rusiyeniñ Qırımnı işğal etmesiniñ aqibetleri aqqında haber bermektir. Bundan ğayrı, bölge içün bar olğan telükelerni muzakere etmege ve yarımadanı işğalden azat etmek ve vaqtınca işğal etilgen topraqlarda yaşağan vatandaşlarnıñ aqlarını qorçalamaq içün yañı usullarnı tüşünip çıqarmağa planlaştıralar, dep teşkilâtçılar yazdılar.
Qırım platforması — 2014 senesi Rusiye tarafından qanunsız olaraq işğal etilgen Qırımnı azat etmek içün dünyanı birleştirmek maqsadınen Ukrayinanıñ 2021 senesi teşebbüs etkeni halqara mesleat-idare şeklidir.
- 2022 senesi Hırvatistanda Qırım platformasınıñ Birinci Parlament sammiti olıp keçti. O zaman anda 44 ülke ve halqara institunıñ 55 vekili iştirak etti.
- 2023 senesi Prahada Qırım platformasınıñ Ekinci Parlament sammiti olıp keçti. Anda 51 ülkeniñ 66 vekili toplaştı.
- 2024 senesi Latviyada Qırım platformasınıñ Üçünci Parlament sammiti olıp keçti ve anda 70 vekilden çoq toplaştı, olarnıñ arasında parlamentlerniñ 36 başı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
