Boş aynıñ 24-nde İsveçiya paytahtı Stokgolmde Qırım platformasınıñ Dörtünci parlament sammiti ötkerilecek. Yuqarı Şura spikeri Ruslan Stefançuk ve İsveçiya parlamentiniñ reisi Andreas Norlen milliy parlamentler ve parlamentlerara teşkilâtlarnıñ yolbaşçılarınen körüşecek.
"Qırım platforması" saytı bu aqqında bildire.
Bu yıl sammitniñ maqsadı — halqara ortaqlarnı Rusiyeniñ Qırım işğali aqibetleri aqqında haberdar etmektir. Teşkilâtçılar, region içün mevcut telükelerni muzakere etmege ve yarımadanıñ işğalden qurtarıluvı ve vaqtınca işğal etilgen topraqlarda vatandaşlarnıñ aqlarını qorçalav içün yañı usullarnı işlep çıqarmağa planlaştıralar.
"Rusiyeniñ tecavuziy cenki halqara uquqnıñ qaba bir bozuluvı, demokratiya ve insan aqlarına ücümdir. Dünya Ukrayinanıñ devletligini qorçalamaq ve topraq bütünligini ğayrıdan tiklemek içün küreşine qol tutmaq kerek", — dep Riksdag reisi Andreas Norlen qayd etti.
Sammit iştirakçileri Rusiye istilâsınıñ iqtisadiy ve ekologik aqibetlerini muzakere etecekler.
Qırım platforması — Ukrayina tarafından 2021 senesi dünya toplulığını 2014 senesi Rusiye tarafından qanunsız işğal etilgen Qırımnıñ işğalden azat etilmesi içün birleştirmek içün teşebbüs etken halqara mesleat ve koordinatsion format.
- Qırım platformasınıñ birinci Parlament sammiti 2022 senesi Hırvatistanda olıp keçti. O vaqıt 44 memleketten ve halqara teşkilâtlardan 55 delegat keldi.
- 2023 senesi Ekinci Parlament Sammiti Pragada olıp keçti. O, 51 memleketten kelgen 66 temsilcini topladı.
- 2024 senesi Latviyada olıp keçken Qırım platformasınıñ üçünci parlament sammiti 70-ten ziyade eyyetni topladı, olarnıñ arasında — 36 parlament reisi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
