"Sarı şerit"niñ iştirakçileri işğal etilgen topraqlarda, şu cümleden Qırımda, yañı bir aktsiyanı teşkil ettiler. Bu aktsiya, boş aynıñ 24-nde Stokholmda başlanğan Qırım platformasınıñ Dörtünci parlament sammitine bağışlanğan.
Areket Telegramda bu aqqında haber berdi.
"Bu, Qırımnıñ Ukrayina olğanını hatırlatmadır. Yüz biñlerce insan topraqlarnıñ işğalden azat etilmesini bekley. Bunıñ içün küreşmege devam etemiz! Qırım platformadaki Ukrayina vekillerine Ukrayina ve ukrayinalılarnıñ menfaatlarını qorçalağanda ğayret ve küç tileymiz. Sizge ümüt etemiz, çünki siziñ arqañızda Qırım, Donetsk, Luğansk sakinleri, VİE Zaporijjâ ve Herson vilâyetleriniñ sakinleri turalar", — dep bildirildi.
"Qırım platforması" saytınıñ bildirgenine köre, bu yılnıñ sammitiniñ maqsadı — halqara oraqlarnı Rusiyeniñ Qırımnı işğal etmesiniñ aqibetleri aqqında haber bermektir. Bundan ğayrı, bölge içün bar olğan telükelerni muzakere etmege ve yarımadanı işğalden azat etmek ve vaqtınca işğal etilgen topraqlarda yaşağan vatandaşlarnıñ aqlarını qorçalamaq içün yañı usullarnı tüşünip çıqarmağa planlaştıralar, dep teşkilâtçılar yazdılar.
Qırım platforması — 2014 senesi Rusiye tarafından qanunsız olaraq işğal etilgen Qırımnı azat etmek içün dünyanı birleştirmek maqsadınen Ukrayinanıñ 2021 senesi teşebbüs etkeni halqara mesleat-idare şeklidir.
- 2022 senesi Hırvatistanda Qırım platformasınıñ Birinci Parlament sammiti olıp keçti. O zaman anda 44 ülke ve halqara institunıñ 55 vekili iştirak etti.
- 2023 senesi Prahada Qırım platformasınıñ Ekinci Parlament sammiti olıp keçti. Anda 51 ülkeniñ 66 vekili toplaştı.
- 2024 senesi Latviyada Qırım platformasınıñ Üçünci Parlament sammiti olıp keçti ve anda 70 vekilden çoq toplaştı, olarnıñ arasında parlamentlerniñ 36 başı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
