Qırımda Moskva ve işğalci yerli elitalar arasında akimiyet ve maliye aqımlarını nezaret etmek içün reqabet arta. Böylece, yarımadanıñ "başı" Serğiy Aksönovğa qarşı RF Devlet dumasınıñ sabıq deputatı Ruslan Belbek kampaniya başlattı. Kreml, Aksönovnıñ yerine "Qırım nazirler şurasınıñ reisi" Yuriy Ğotsanükni tayin etmege bile.
Boş aynıñ 5-nde Sahte malümatqa qarşılıq merkezi (SMQM) bu aqqında haber etti.
SMQM malümatına köre, Aksönovnıñ mevamı, Rusiye kütleviy haber vastalarında yapılğan ve Qırımda büyük qabarcılıqnı, cinaiy teşkilâtlarnen sıqı bağlarnı ve biznes "çetkilerini" aydınlatqan bir sıra yayınlardan soñ sarsıldılar.
Bu kampaniyanıñ teşebbüsçisi "özü repressiyalarnıñ qurbanı olğan" Ruslan Belbek olaraq adlandı. Hususan, Aksönov ve Qırım FSB idaresiniñ kirişmesinden soñ onı "iftira" ve "sırlı malümatnı aydınlatqanı" içün tuttılar.
"Qırımda qabarcılıq ve iç zıddiyetlerniñ miqyası Aksönovnı Moskvağa "kilimde" çağırmağa sebep oldı. Anda oña federal paralarnı hırsızlağanı içün qabaatlav lafı berdiler, bu ise, yolbaşçılıq deñişmesi aqqında laflarnı quvetleştirdi. Kreml, yerli "deputatlarnıñ" ekseriyetiniñ destegi olğan ve daa idare etici bir şahıs ola bilecek daa bir işbirlikçi Yuriy Ğotsanükniñ namzetini baqmaqta", — dep haberde aytıla.
Evel "Strateğiya XXI" globalistika merkeziniñ prezidenti Mihayil Ğonçar Suspilne Qırımğa Qırımnıñ işğalci yolbaşçısı Aksönov ve onıñ etrafında bulunğanlar yarımadada kerçekten yanacaq monopoliyasını meydanğa ketirgenlerini, bu ise buhrannı daa da kerginleştirgenini ve benzin fiyatlarınıñ köterilmesine sebep olğanını aytqan edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
