Advokat Emil Kurbedinov Rusiye FSBsiniñ İctimaiy munasebetler merkezinde resmiy şikâyet berdi. Vesiqa müessiseniñ resmiy media resurslarında "terroristik faaliyetnen" alâqası bar olğanında sebepsiz qabaatlanğan qırımtatarlar tutulğanı aqqında tarqalğan malümatqa dair.
Advokat Facebook saifesinde bu aqqında bildirdi.
"Şikâyet, media resurslarında ve saytlarında Qırımda qadınlarnıñ tutulması aqqında malümatnıñ tarqalmasına dair. Tutulğan qadınlarnıñ terroristik faaliyetnen oğraşqanları ve ilâhre aqqında malümat yañlış", — dep Kurbedinov qayd etti.
Öz arizasında o, derc etilgen malümatnıñ doğrulığını teşkermege ve resmiy red etüvni ya da tüzetüvni bildirüv yerleştirilgen resurslarda derc etmege rica ete.
Hususan, advokat, FSBniñ 2025 senesi ekim ayınıñ 15-nde derc etilgen "Rusiye FSBsi Qırımda halqara terroristik teşkilâtınıñ faaliyetini toqtattı" serlevalı materialda añılğan teşkilât Rusiye Federatsiyasınıñ qanunlarına köre terroristik teşkilât olaraq tanılmağanını añlatmasını talap ete.
Kurbedinov, "qızlarnıñ terroristik faaliyetke qoşulması" ve yasaq etilgen teşkilâtqa ait olğanları aqqında iddialarnı red etmege talap ete.
İstegi qanaatlendirilmese ya da qanun tarafından belgilengen müddet içinde cevap berilmese, imayeniñ advokatı — Elvira Nimetulayeva — namus, itibar ve iş itibarını qorçalamaq içün Rusiye FSBsine, em de Roskomnadzorğa, arbiy prokuraturasına ve RF arbiy-tahqiqat komitetine muracaat etmege aqqını saqlap qala.
2025 senesi orta küz ayınıñ 15-nde qırımtatar qadınlarınıñ apiske alınması aqqında ne bilemiz
Orta küz ayınıñ 15-nde saba işğalciler Qırımda dört qırımtatar qadınını tuttılar.
Birinciden Bağçasarayda bir qaç balanıñ anası ve siyasiy mabüs Remzi Nimetulayevniñ apayı Esma Nimetulayeva tutuldı.
Aynı rayonnıñ Holmivka (Zalanköy) köyünde işğalciler bala bağçasında terbiyeci olıp çalışqan pedagogika kolleciniñ studenti Nasiba Saidovanıñ evini tinttiler. Dolınnede (Topçıköyde) quvetçiler Elviza Aliyevanıñ evine kirdiler, Orlivkada (Mamaşayda) ise Fevziye Osmanovanıñ evini tinttiler.
Tutulğanlarnıñ episi Simferopoldaki (Aqmescitteki) FSB idaresiniñ binasına ketirildi ve olarğa Rusiyede yasaq etilgen "Hizb ut-Tahrir" teşkilâtında iştirak etkenleri aqqında madde boyunca şübe bildirildi. Rusiyeniñ "RİA Novosti" devlet agentligi, işğalli FSBge atıf etip, tutulğan qadınlar "Qırım musulmanları arasında dünya halifeliginiñ ideologiyasını tarqatqanı" aqqında bildirdi.
Orta küz ayınıñ 16-nda Qırımnıñ işğalli Kıyiv rayon mahkemesi olarnı eki ayğa apiske aldı. Apiske alınğan qadınlarğa qarşı qorçalayıcı tedbirlerniñ saylanuvı boyunca bütün dört oturış qapalı şekilde keçirildi. Advokat Emil Kurbedinovnıñ aytqanına köre, bütün qadınlar işğal etilgen Simferopoldaki (Aqmescitteki) 1-nci SİZOda tutulacaq. Onıñ malümatına köre, Esma Nimetulayeva işğalciler tarafından Rusiye Ceza qanunnamesiniñ 205.5-nci maddesiniñ 1-inci qısmı (terror teşkilâtınıñ faaliyetini teşkil etüv) boyunca qabaatlana, diger apiske alınğan qadınlar ise aynı maddeniñ 2-nci qısmı (terror teşkilâtında iştirak etüv) boyunca qabaatlanalar.
Esma Nimetulayeva — beş balanıñ anası, 2023 senesi arman ayınıñ 23-nde işğalciler tarafından tutulğan ve Hizb ut-Tahrir davasınıñ beşinci Bağçasaray gruppasınıñ siyasiy mabüsi Remzi Nimetulayevniñ apayıdır.
Nasiba Saidova — pedagogika kolecinde oquğan, bala bağçasınıñ bebek gruppasında çalışqan qız, dep "Qırım birdemligi" bildirdi.
Fevziye Osmanova — tükân hadimi, onıñ evi Bağçasaray rayonınıñ Orlivka köyünde yerleşe.
Elviza Aliyeva Simferopoldaki (Aqmescitteki) fırında kasiyer olıp çalıştı, Qırım federal universitetiniñ dörtünci kursında "Menecment" ihtisasını ala.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
