Appaz Kurtametniñ mentorı, Lüdvig-Maksımilian Münhen universitetiniñ dotsenti Frantsıska Devis oldı. Alim Ukrayina Tış işler nazirliginiñ advokat mentorlığı teşebbüsi çerçivesinde eñ genç Qırım siyasiy mabüsiniñ cemaat mentorı ve imayecisi olaraq saylandı.
Ukrayina prezidentiniñ Qırım Muhtar Cumhuriyetindeki temsilciliginiñ saytında bu aqqında haber etildi.
"Appaz Kurtamet Rusiye Federatsiyası tarafından hırsızlanğan eñ genç siyasiy mabüslerden biridir. Arman ayında 23 yaşını tolduracaq. Appaznı işkencege oğratalar, ve onıñ esas insan aqları muntazam sürette bozula. Onı deral azat etmek kerek. Appaz Kurtamet ve diger ukrayin siyasiy mabüsleriniñ ikâyelerini tarqatmağa çağıram. Bütün ömürleri ögünde olğan gençlerniñ hırsızlanması — "Rusiye dünyası"nıñ kerçekidir", — dep içtimaiy ağlarında Frantsıska Devis tarif etti.
Frantsıska Devis — Ludvig-Maksımilian Münhen Universitetiniñ Şarqiy ve Orta Şarqiy Avropa kafedrasınıñ dotsenti. O, Ukrayina, Poloniya ve Rusiyeniñ yañı tarihını tedqiq ete.
Advokatlıq mentorlığı teşebbüsi çerçivesinde, Frantsıska Devis, Appaz Kurtametke, onıñ taqdiri halqara seviyede belli ve aytılğanını hatırlatmaq içün, destek mektübi yazdı. O, siyasiy mabüske qol tutmağa devam etecek ve halqara toplulıqnıñ diqqatını işğal etilgen Qırımda ve Rusiye toprağında insan aqlarınıñ bozuluvına celp etecek.
Bir qaç kün evelsi siyasiy mabüsniñ anası Ayşe Kurtamet, oğlu ilk yaz ayınıñ 18-28 künleri Pskov vilâyetindeki ceza izolâtorında tutılğanını bildirdi. Onıñ aytqanına köre, ceza içün sebep yoq edi.
Daa evel o, Türkiye prezidenti Recep Tayyip Erdoğanğa oğlunı azat etmege yardım etmesini rica etip, video muracaatını yazğadı.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
