İşğal etilgen Qırımda ekim ayınıñ 26-ndan itibaren 270 yaqıt stantsiyası çalışa, mında yaqarlıqnı sıñırsız satın almaq mümkün. Evelleri 150 benzin stantsiyasında 30 litrge qadar benzin almaq mümkün edi.
Qırımnıñ işğalci yolbaşçısı Sergey Aksönov Telegramda bu aqqında bildirdi.
"Ekim ayınıñ 26-nda saat 9:00-dan itibaren Qırım Cumhuriyetiniñ territoriyasında 270 benzin stantsiyası çalışacaq, anda yaqıt sıñırlav ve sıñırlamalarsız serbest satıla", — o dedi.
Ekim ayınıñ 26-nda Qırımnıñ yaqarlıq ve energetika nazirligi Telegramda yaqarlıq satmağa başlağan yerlerniñ adreslerini derc etti.
İşğalci akimiyetniñ yaqıtnı serbest satqan stantsiyalarnıñ arttırılması aqqında bildirüvine baqmadan, sakinler benzinniñ keyfiyetsizliginden şikâyet eteler.
Hatırlatamız, oktâbrniñ 17-nden itibaren işğal etilgen Qırımda benzin stantsiyalarınıñ çoqusından tek benzin degil, dizel yaqarlığı da ğayıp oldı. Ğaliba, aynı şu künü Ukraina arbiyleri tarafından Gvardiyskiydeki neft bazaları ve yaqıt yedekleri zarar kördi.
Tışqı istihbarat hızmeti, 2025/2026 qışında benzin qıtlığı ile bağlı buhrannıñ daa beter olacağını tahmin ete. Bu vaziyet, ilk evelâ, Qırım ve öz neft istisalcılıq imkânları olmağan ve Rusiye Federatsiyasından ketirilgen neftke bağlı olğan diger işğal etilgen topraqlarğa tesir etecek.
Daa evel ekspertler, işğal etilgen yarımadada rusiyeliler içün müim olğan ve ukrain tarafı içün prioritet olğan onlarnen büyük yaqıt obyektleri bar, dep bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
