İşğalciler tarafından 2016 senesi kiçik aynıñ 11-nde tutulğan siyasiy mabüs Vadım Siruk "Serbest Qırımğa mektüpler" aktsiyası çerçivesinde alınğan mektüpke cevap berdi. Bu mektüp oña dört ay devamında yollanıldı, cevap ise orta küz ayında keldi.
Ukrayina Prezidentiniñ Qırımdaki Temsilciligi bunı bildirdi. Müessise mektüpniñ bir qısmını derc etti.
"Siziñ sorağanıñız qıyınlıqlar, menim endi 9 buçuq yıl devamında bu yerde rastkelgenim qıyınlıqlar, menim içün adiy, er künlik oldı, ve men olarğa alıştım. Allah bizge çekip olğanımızdan daa çoq şey yüklemey, qalğanı ise — taqdirniñ sarsıntılarıdır. Qırım — menim vatanım, küneşli, bereketli toprağım, Qara ve Azaq deñizleri, çoq dağlar, tropik iklim, ormanlar ve qırımtatarlarnıñ evlerde ve soqaqlarda, yıllar keçken soñ, Qırım hanlığınıñ zamanından saqlanıp qalğan ve keçken renkleri. Bağçasaraynıñ qadimiy bir bilge şeeri ne qadar qıymetlidir. Diqqatıñız ve samimiy hayırlavlarıñız içün tekrar teşekkürler bildirem. Siziñ mektübiñiz maña 28.07.2025 künü keldi, yani dört ay keçti. Cevap sizge daa tez kelecegini ümüt etem, inşallah. Peyğamberimiz Muhammed dedi ki: "Dünya dört şeyge dayanır: alimlerniñ bilgisi, zenginlerniñ cömertligi, fuqarelerniñ duası, ükümdarlarnıñ adaletligine". Tek kerçekten sabırlı olğan eñ yahşısını bekley. 28.07.2025. Sayğı ile, Siruk Vadım", — dep siyasiy mabüs yazdı.
Temsilcilikniñ qayd etkenine köre, siyasiy mabüslerge yazılğan mektüpler çoq vaqıt ala ve er bir cevap qıymetlidir.
"Cevaplar da işğalli memuriyetniñ tsenzurası ve nezaretinen qıyın bir yol keçe. Mektübiñizni alıp ketip ketmeycegini bilmeden beklemek — bu, kerçekten de, bir çağıruv. Amma soñ, apiste yatqan insandan yazılğan cevap kelgende, añlay ediñiz: bu qıymetlidir. Er bir böyle mektüp, Rusiyeniñ olarnı izolâtsiya etmege tırışqanına baqmadan, siyasiy mabüslernen alâqalar bar olğanını isbatlay", — dep haberde bildirildi.
"Serbest Qırımğa mektüpler" aktsiyası 2023 senesi çiçek ayında başlatıldı. 2024 senesi devamında ukrayinalılar ve çetelde yaşağan Ukrayina dostları 1800-den ziyade destek mektübini yazdılar. Teşebbüs Ukrayina Prezidentiniñ Qırım Muhtar Cumhuriyetindeki Temsilciligi, PEN Ukraine, ZMINA İnsan aqları merkezi, Crimea Daily, QırımSOS, Qırım esnası ve diger ortaqlarnıñ umumiy ğayretleri sayesinde çalışa.
Hatırlatamız ki, 2024 senesi ilk qış ayında siyasiy mabüsniñ apayı Anna Boğaçeva "Qırım birdemligi"ne ayttı ki, Vadım uzun körüşüv vaqtında oña sağlıq alı, sıq suvuqlanma ve 2 nomeralı tüzetüv müstemlekesinde kerekli tibbiy yardım olmağanı aqqında tarif etti.
Vadım Siruk aqqında ne bilemiz
Vadım cemiyetniñ faal azası edi, diniy binalarnıñ, hususan Vasilivka köyündeki caminiñ ğayrıdan tiklenüvine qoşuldı, Simeizde qadimiy mezarlıqnı qorçaladı, bayram tedbirlerini teşkil etti ve diniy merasimlerde iştirak etti.
Qırım işğali ve istilâsı sebebinden Rusiye tarafından repressiyalar ve taqipler başlanğan soñ Vadım siyasiy mabüslerniñ qorantalarına faal destek kösterdi, qanunsız "makemeler"ge barıp, siyasiy mabüslerniñ qorantalarına maneviy ve maddiy destek kösterdi.
2016 senesi kiçik ayınıñ 11-nde işğal etilgen Yalta ve Aluştada işğalli memuriyetniñ quvetçileri yerli sakinlerniñ evlerinde qanunsız kütleviy tintüvler keçirdi. O künü Vadım Siruknen beraber diniy erbap Muslim Aliyev, uquq qorçalayıcı Emir-Usein Kuku ve mektep qorçalayıcısı İnver Bekirov tutuldı.
2020 senesi bozarğannıñ 25-nde Rusiyeniñ Moskva vilâyetindeki Vlasiha şeer makemesi Vadım Siruknıñ istinaf şikâyetini red etti.
Appelâtsiya red etilgen soñ, siyasiy mabüs Qırımdan 2000 km uzaqlıqta yerleşken Rusiye Federatsiyasınıñ Başqırstan Cumhuriyetiniñ Salavat şeerindeki İK-2 müstemlekesine etap etildi.
O, anda kelgende, qanunsız alda 17 künge ceza izolâtorına qapatıldı. Bundan da ğayrı, yaramay ava, yahşı anşama ve vitamin qıtlığı sebebinsen, siyasiy mabüsniñ sağlığı daima fenalaşa. Bundan da ğayrı, onıñ tişlerinem meseleleri bar, apishaneniñ tiş ekimi ise kerekli yardım köstermek içün kelmey.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
