OSCE çerçivesinde tamır halqlarınıñ aqlarını qorçalamaq içün areket planınıñ azırlanması pek müimdir. Bu, Ukrayinanıñ tamır halqları ve Rusiyede yaşağan halqlarnıñ ögünde turğan çağıruvlarğa cevap bermege imkân berecek.
"Qırımtatar resurs merkezi"niñ idare reisi Eskender Bariiev, orta küz ayınıñ 13-nde Varşavadaki QRM tarafından keçirilgen, Ukrayinanıñ vaqtınca işğal etilgen topraqlarında tamır halqlarına qarşı ırq ayırımı ve repressiyalarğa bağışlanğan tedbirde bunı bildirdi.
Bundan da ğayrı, Ukrayina tamır halqlarınıñ aqlarını qorçalav saasında 2014 senesinden soñ başlağan müsbet deñişmelerni devam ettirmeli, dep Bariiev tüşüne.
"Ukrayinanıñ "Tamır halqları aqqında" qanunı qabul etildi, lâkin bu qanun yalıñız beyanname olaraq qalmasın dep, onıñ tolusınen amelge keçirilmesini temin etmek kerek. Biz bu esnas üzerinde faal çalışamız. Amma, qanunğa köre, Ukrayina Nazirler Kabineti tarafından Qırımtatar Milliy Meclisiniñ uquqiy statusı pekitilmedi. Buña diqqat ayırmaq ve beraberlikte bu meseleni çezmek içün çalışmaq kerek", — dep Bariiev qoştı.
Qırımtatar Milliy Meclisiniñ kommunikatsiyalar idarecisi Tetâna Savçuknıñ aytqanına köre, bu repressiyalardan eñ çoq zarar körgenler tamır qırımtatar halqıdır.
"İşğal vaqtında 455 siyasiy mabüsni ve cinaiy "dava" boyunca taqip etilgenlerni qayd ettik, olarnıñ arasında 258-i — qırımtatar halqınıñ vekilleri. Bugün 298 insan apiste tutula, olardan 164-ü — qırımtatar", — dep qayd etti o.
Tedbir iştirakçileri arasında işğal etilgen Qırımda qanunsız sürette mahküm etilgen Mamut Belâlovnıñ qardaşı Fadme Belâlova da bar edi. O, qardaşınıñ taqip etilüvi aqqında tarif etti.
"Eger qardaşım esirlerni deñiştirüv çerçivesinde deñiştirilmese, o, ömrüniñ eñ yahşı yıllarını — 12 yılını — apishanelerde ve müstemlekelerde keçirecek. Siyasiy mabüslerni qorantalarından bütünley ayırmaq içün çoqusı Qırım tışına yollanıla. Qardaşım da istisna olmadı", — dep Fadme Belâlova ayttı.
Mamut 2022 senesi ilk küz ayında Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) işğalli "Qırım Cumhuriyeti kurort ve turizm naziri"ni öldürmek ıntıluvında uydurılğan qabaatlavlar boyunca yaqalandı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
