Orta küz ayınıñ 13-nci gecesi Feodosiyadaki (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addeki) neft bazasına ücüm vaqtında 16 yaqarlıq rezervuarı zarar kördi. Müessiseniñ toprağında alâ daa büyük yanğın bar.
Orta küz ayınıñ 15-nde USQniñ Baş ştabı bu aqqında haber berdi.
"Tafsilâtlı malümatqa köre, 2025 senesi orta küz ayınıñ 13-nci gecesi VİE Qırım MCniñ vaqtınca işğal etilgen Feodosiya (Kefe — terciman) şeerindeki “Deñiz neft terminalı“ müessisesine ücüm tasdıqlandı. Feodosiyadaki neft terminalı, rusiye ordusını yaqarlıq-yağ malzemelerinen temin etmek içün müim bir logistika merkezidir. Rezervuarda saqlana bilgen neft malzemeleriniñ umumiy miqdarı tahminen 193 biñ kub. m", — dep bildirildi
Hatırlatamız ki, Feodosiyadaki (Kefedeki) neft bazasına ücüm etilgen soñ şeer qısmen suvsız, elektriksiz ve internetsiz qaldı, soqaqlar qapatıldı ve eñ az 800 insan tahliye etildi. Qırım faalcisi anonim şartnen Qırım.Aqiqatqa dronlarnıñ ücüminden soñ işğal etilgen Feodosiya (Kefe) şeerindeki vaziyet aqqında añlattı.
Bu, eki aftada bu obyektke üçünci ücümdir — ilk küz ayınıñ 29-nda ilk kere, orta küz ayınıñ 6-nda ekinci kere ücüm etildi.
Bundan ğayrı, Baş ştabnıñ malümatına köre, orta küz ayınıñ 14-nci gecesi Ukrayina Mudafaa quvetleri Krasta Polânadaki (VİE Qırım MC) RLS P-18 radiolokatsiya stantsiyasına, Oleşkıdaki (VİE Herson vilâyeti) UUAni idare etüv noqtasına ve Makiyivka rayonındaki (VİE Donetsk vilâyeti) arbiy silâ yedegine ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
