Qırımda işğalciler gençlerni arbiyleştirmege devam eteler. Yarımadanıñ işğalli Qurman rayonı prokurorlığınıñ vekilleri kadet sınıfınıñ talebeleri içün dersler alıp bardılar.
Rusiye kontrolindeki Qırım prokurorlığı Telegramda bunı bildirdi.
"Krasnogvardiya (Qurman — terciman) rayonı prokurorlığınıñ hadimleri "1-nci Petrovska mektebi" belediye tasil müessisesiniñ kadet sınıfınıñ talebelerine "Rusiye Federatsiyasınıñ prokurorlığı organlarınıñ şekillenüv tarihı" mevzusında lektsiya keçirdiler. Mektep talebelerine Rusiye Federatsiyasınıñ prokurorlığınıñ tarihı aqqında filmni kösterdiler", — dep haberde bildirildi.
Hatırlatamız ki, Qırımnıñ tasil nazirliginiñ "Balalarnıñ terbiye, raatlıq ve sağlamlaştıruvı" bölüginiñ reberi Gennadiy Şveydel RİA "Novosti Krım" agentligine bergen intervyusında tarif etti ki, yaz devamında bala lagerleri Ukrayinağa qarşı cenkleşken arbiy hızmetçilernen beraber vatanperverlik deñişmelerini keçirdi.
İlk küz ayınıñ 17-nde UHHniñ Qırım Muhtar Cumhuriyetindeki Baş idaresiniñ matbuat hızmeti bildirdi ki, "Varâg" arbiy-vatanperver klubınıñ ve "Qırım sıñır bekçileri birligi"niñ yolbaşçısı qabaatlav aktı makemege yollanıldı.
Taqiqatnıñ malümatına köre, o, işğalciler balalarğa istihbarat-diversiya faaliyetini, silâ qullanuv usullarını ve uçucısız uçaq aletlerini idare etmege ögretecek "lager"niñ qurucılığını idare ete.
Bundan da ğayrı, ilk küz ayınıñ 20-nde Ukrayina prezidenti işğal etilgen Qırımnıñ 66 memurı ve iş adamına qarşı sanktsiyalar kirsetti, şu cümleden, sanktsiya cedvelinde Rusiye tasil standartlarını kirsetken ve oquv esnasını arbiyleştirgen vaqtınca işğal etilgen Qırım tasil, ilim ve gençlik naziri Valentina Lavrik bar. 2024 senesi boş ayda oña devlet hainliginde şübe bildirdiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
