Rusiye FSBsiniñ hadimleri, Ukrayina arbiy istihbaratına Rusiye ava mudafaası sistemalarınıñ yerleşüvi aqqında malümat toplağanında ve bergeninde şübelengen işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinini tuttılar.
Rusiye FSBniñ Qırım ve Sevastopoldaki (Aqyardaki) idaresi bunı bildirdi, dep RİA "Novosti Krım" Rusiye teşviqat agentligi haber berdi.
Rusiye taqiqatçılarınıñ malümatına köre, adamnı "Ukrayina arbiy istihbaratınıñ temsilcisi Telegram messencerinden celp etti". O, işğal etilgen Qırım ve Sevastopolda (Aqyarda) Rusiye ava mudafaası sistemalarınıñ yerleşüvi aqqında malümat toplağanında şübelengen ola.
FSB bildirdi ki, şübelengen adam "baylardaki gemilerniñ fotoresimlerini ve AMSnıñ yerleşüvi aqqında malümat bere edi". Oña qarşı "devlet hainligi" maddesine istinaden cinaiy dava açıldı, o, 20 yılğa qadar apis cezasını ala bile.
Şimdiki vaqıtta şübelengen adam, müessiseniñ malümatına köre, " qabaatnı itiraf ete".
Hatırlatamız ki, Rusiye Federatsiyasınıñ Cenübiy bölgeniñ arbiy mahkemesi işğal etilgen Sevastopolnıñ (Aqyarnıñ) 51 yaşındaki sakinini "devlet hainligi" ve "terakt azırlağanı" içün sert rejimli müstemlekede 15 yılğa üküm etti. Rusiye mahsus hızmetleriniñ versiyasına köre, onı RF Silâlı quvetleriniñ obyektleri ve naqliyat astyapıları aqqında istihbarat toplamaq içün Ukrayina havfsızlıq hızmeti celp ete edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
