Rusiye Federatsiyasınıñ Cenübiy bölgeniñ arbiy mahkemesi işğal etilgen Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) 51 yaşındaki sakinini "devlet hainligi" ve "terroristik areketlerge azırlıq körgeni" içün sert rejimli müstemlekede 15 yılğa üküm etti. Rusiye mahsus hızmetleriniñ malümatına köre, RF Silâlı quvetleriniñ obyektleri ve naqliyat astyapıları aqqında istihbarat toplamaq içün Ukrayina havfsızlıq hızmeti onı celp etken. Adam demiryol köprüni patlatmaq içün, gizliden patlayıcı alğan.
Rusiye FSBsiniñ Qırım ve Sevastopoldaki (Aqyardaki) işğalli idaresi bunı bildirdi, dep orta küz ayınıñ 8-nde RİA “Novosti Krım” Rusiye teşviqat haber agentligi haber berdi.
Uquq qorçalayıcılarnıñ bildirgenlerine köre, gizli yerde patlayıcı aletler, geksogen yükleri, elektrik detonatorları ve bericiler saqlanıla edi. Bularnıñ episi, tintüv vaqtında tapıldı.
O, müstemlekede 15 yıllıq cezasını aldı, birinci 5 yılnı apishanede keçirecek, em de 50 biñ ruble para cezasını alacaq.
İşğalli FSB, yaqalanğan şahısnıñ ilerideki raketa ücümleri içün AM sistemaları aqqında malümat toplağan daa bir Sevastopol sakinini işbirlikke celp etkenini iddia ete. Ekinci mabüsniñ davasını "Sevastopol şeer mahkemesi" baqa.
Ukrayina uquq qorçalayıcıları Qırımdaki işğalli mahkemelerniñ er angi areketleri uquqiy ceetten qanunsız olğanını ve Ukrayina vatandaşlarınıñ taqip etilüvi halqara uquq ve Jeneva şartnamesiniñ bozuluvı olğanını defalarca qayd ete ediler.
Birleşken Milletler Teşkilâtınıñ İqtisadiy, içtimaiy ve medeniy aqlar eyyeti (CESCR) Rusiye Federatsiyasınıñ keçici esabatınıñ neticelerini aydınlattı. Vesiqada Rusiyeniñ Ukrayinanıñ vaqtınca işğal etilgen topraqlarındaki, şu cümleden işğal etilgen Qırımdaki vaziyet içün mesüliyeti tasdıqlandı.
Hatırlatamız ki, orta küz ayınıñ 8-nde Qırım Muhtar Cumhuriyeti ve Sevastopol (Aqyar) şeeri prokurorlığı ve Ukrayina prezidentiniñ Qırım Muhtar Cumhuriyetindeki temsilciligi "Qırımda cenk cinayetleri" malümat leyhasını taqdim etti. Onıñ maqsadı, işğal etilgen yarımada sakinlerine, olarğa yapılğan areketler cenk cinayeti ola bilgenini añlatmaq ve aqlarını nasıl qorçalamaq mümkün olğanını añlatmaqtır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
