Rusiye çoq ukrayin medeniyet mirasını, şu cümleden Dünya mirasını — "Qadimiy Hersones ve horları"nı, yoq etkeni içün orta küz ayınıñ 9-nda UNESCOnıñ İcra şurası, vaqtınca işğal etilgen Qırım toprağındaki vaziyetni nezaret etmege devam etmege qarar berdi.
Ukrayina Tış işleri nazirliginiñ matbuat hızmeti bu aqqında haber etti.
"Qarar UNESCO Baş müdiriniñ Rusiyeniñ vaqtınca işğal etkeni Qırımdaki vaziyetke dair esabatına esaslana, o, Ukrayin yarımadasında vaziyetniñ kerginleşkenini tasdıqlay, şu cümleden Rusiyeniñ Ukrayina medeniy mirasınıñ, şu cümleden UNESCO Dünya mirası obyektiniñ "Qadimiy Hersones şeeri ve horları"nıñ bozulğanını, Rusiyeniñ qırımtatarlarnıñ aqlarını bozuvını, işğalli akimiyet tarafından jurnalistlerniñ qanunsız taqip etilüvini, tasil saasında ukrayin ve qırımtatar tillerinde oqutuv aqqı, din serbestligi ve diger insan aqlarınıñ bozuluvını tasdıqlay", — dep TİNniñ haberinde qayd etildi.
Oturışya Çehiya eyyeti 44 UNESCO azası devleti adından beyanatnen çıqışta bulunıp, işğal etilgen Qırımda Rusiyeniñ areketlerini takbih etti — qırımtatarlarnıñ taqip etilmesinden başlap, medeniy ve diniy abidelerniñ yoq etilmesine qadar. Vesiqada Rusiye işğalli akimiyetiniñ mesüliyetsiz areketleri sebebinden ekologik zararğa da diqqat aytıla.
Litvaniya, Türkiye, Almaniya, Albaniya ve Çili eyyetleri Ukrayinanıñ suvereniteti ve topraq bütünligine qol tutqanı aqqında ayrı beyanatlar yaptılar.
Ukrayinanıñ UNESCO daimiy temsilcisi Vadım Omelçenko nezaretni devam etmek müimligini qayd etti:
"İcra şurasınıñ qararı, halqara uquq, insan aqları ve Ukrayinanıñ topraq bütünliginiñ halqara seviyede tanılğan sıñırlarında qorçalavına yönelgen UNESCO azası devletleriniñ çoqusınıñ deñişmez nazar noqtasını tasdıqlay", — dep elçi qayd etti.
Ukrayina Tış işleri nazirligi qayd etti ki, UNESCOnıñ İcra şurasınıñ qararı teşkilâtnıñ aza devletleriniñ çoqusınıñ halqara uquq, insan aqları ve Ukrayinanıñ halqara seviyede tanılğan sıñırlarında topraq bütünliginiñ qorçalavına yönelgen deñişmez nazar noqtasını tasdıqlay.
Hatırlatamız ki, işğal etilgen Ukrayina topraqlarından, hususan Qırımdan, Rusiye strukturaları eñ az 178 medeniy degerlikni alıp ketti. Olarnıñ arasında işğal etilgen yarımadada qazılğan 140-tan ziyade artefakt ve Hersoneske ketirilgen 37 eksponat.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
