Rusiye strukturaları eñ azından 178 medeniy qıymetini işğal etilgen Ukrayina topraqlarından, hususan Qırımdan, alıp kettiler. Olarnıñ arasında işğal etilgen yarımadada qazılğan 140-tan ziyade artefakt ''Kamyana Moğıla'' müzeyinden Hersoneske ketirilgen 37 eksponat.
Ukrayina Mudafaa nazirliginiñ Baş istihbarat idaresi War&Sanctions portalında "Hırsızlanğan miras" bölüginde bu malümatnı derc etti.
Derc etilgen malümatqa köre, Qırımda qanunsız arheologik qazmalarda 140-tan ziyade artefakt tapıldı — hususan Hersonesniñ Cenübiy civarındaki obyektlerde, Kadıkivske (Roma lageriniñ) şeerçiginde ve "İoann Predteçi kilsesi" Bizans mimarlığı abidelerinde. İşğalciler tapıntılarnıñ bağlamını bozıp, olarnı ukrayin tarihiy mirası olaraq qalmaq kerek olğan yerlerden çıqardılar.
Ayrca Bİİ, 2023 senesi "Hersones" müzeyine "Kamyana Moğılanıñ petrogliflerinde ecdatlarnıñ maneviy dünyası" adlı "vaqtınca sergi" adı altında köçürilgen "Kamyana Moğıla" Milliy tarihiy-arheologik müzeyiniñ 37 eksponatı aqqında bildirdi. "Sergi"ler medeniy miras eşyalarınıñ çıqarılmasını qanuniyleştirmek içün qullanıla.
Derc etilgen cedvellerniñ temelinde yer alğan malümatnıñ bir qısmı, artefaktlarnıñ qanunsız areketlerini belgilemege ve vesiqalaştırmağa yardım etken War&Sanctions halqara hakatonınıñ iştirakçileriniñ yardımınen toplandı.
"Ukrayin medeniyeti ve tarihını zapt etip, Rusiye ukrayin milliy kimligini yoq etmege, istilâ ve işğalni qanunlaştırmağa tırışa. Cinayetlerni vesiqalandırmaq — adaletni tiklemek ve bütün qabaatlılarnı mesüliyetke çekmek içün birinci adımdır", — dep Ukrayina Mudafaa nazirliginiñ Bİİ bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
