İşğal etilgen Qırımdaki camilerde video nezareti kameraları qoyula. Resmiy versiyağa köre, bu "havfsızlıq ve içki nezaret içün" yapıla. Aynı zamanda diniy erbaplar ve uquq qorçalayıcılar qasevet eteler ki, bu tedbirler musulman cemiyetini nezaret etmek içün qullanıla bile.
Qırım musulmanları diniy idaresiniñ (QMDİ) bildirgenine köre, kameralarnıñ qoyulması caminiñ maneviy maqsadına zıt kele ve müminlerniñ din serbestligini sıñırlay bile.
"Cami — Allahnıñ evi, ne arbiy bölük, ne polis bölügidir. Amma tasavvur etiñiz: dua etmek içün turıp, Allah ögünde baş egesiñiz — ve şu anda siziñ kamerada qayd etilecegiñizi bilesiñiz. Siziñ areketleriñiz, bulunmasıñız, baqışlarıñız bile dosyege yazıla bile", — dep muracaatta qayd etildi.
QMDİ qayd etti ki, havfsızlıq numayışları altında nezaret sistemasınıñ qurulması musulman cemiyetini qorqutmaq ve müminlerniñ maneviy ayatını bile nezaret altına almaq ıntıluvıdır.
"Ebet, kameralarnı qoyalar. Ebet, camini közetüv noqtasına çevirmege tırışalar. Lâkin olar iç bir vaqıt ruhumıznı ve inancımıznı nezaret altına alıp olamaycaqlar. Qırım musulmanları er vaqıt Ukrayina ile beraber ediler. Ve taqipke baqmadan, repressiyağa baqmadan — biz serbest ukrayin halqınıñ bir qısmı olıp qalamız", — dep beyanatta bildirildi.
QMDİ qayd etti ki, işğalli akimiyetniñ böyle areketleri Qırım musulmanlarına qarşı sistematik basqınıñ bir qısmı ola, olarnıñ arasında onlarnen adam sahte davalar boyunca, şu cümleden "Hizb ut-Tahrirde iştirak etkeni" içün, mahküm etildi.
Hatırlatamız ki, işğal etilgen Qırım camilerinde video nezareti kameralarınıñ qoyulması aqqında qırımtatar uquq qorçalayıcısı ve jurnalisti Lütfiye Zudiyeva haber etti.
"Bugün Qırımnıñ bir çoq camisinde kameralar yerleştirildi. Resmen olarnıñ qoyulmasını havfsızlıq ve içki nezaret meselelerinen añlatalar, amma kerçekten de video kameralardınan alınğan videolar, din cemiyetiniñ diniy ayatını nezaret etmek içün qullanıla bile", — dep Zudiyeva bildirdi.
Uquq qorçalayıcı qayd etti ki, böyle bir ameliyat Rusiye qanunlarına bile zıt kele, hususan şahsiy malümat qoruvı, vatandaş timsaliniñ qoruvı ve vicdan serbestligi aqqında qanunlarğa zıt kele.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
