İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) 39 yaşındaki yerli sakin "aşırıcılıq faaliyetine açıq çağıruvlar" yapqanında şübelenip tutuldı. Rusiye havfsızlıq hızmetiniñ malümatına köre, adam ukrayin kanalında "Rusiye ordusına qarşı zorbalıqqa çağıruvlarnen tefsirlerni derc etti".
RİA "Novosti Krım", FSBniñ Qırım ve Sebastopoldaki (Aqyardaki) işğalli idaresine esaslanıp, bunı bildirdi.
Nazirlikniñ bildirgenine köre, teşkerüv neticesinde mektüpler "aşırıcı" olaraq tanıldı. Tutulğanğa qarşı aşırıcı faaliyetke çağıruvlar boyunca cinaiy dava açıldı.
Rusiye Federatsiyasınıñ Ceza qanunnamesine binaen, adam beş yılğa qadar ya da mecburiy işler cezası ve belli faaliyetnen oğraşmaq aqqı sıñırlanmasına mahküm etile bilir.
Daa evel işğal etilgen Sevastopolda (Aqyarda) Ukrayina istihbaratınen işbirlik yapqanında qabaatlanğan qadın tutuldı. Bundan da ğayrı, onıñ aşçı olıp çalışqanı ve "Rusiye ordusını zeerlemege planlaştırğanı" aqqında haber etildi. O, apiske alındı ve "devlet hainligi"nde qabaatlandı.
"Qırım uquq qorçalayıcı gruppası"nıñ yolbaşçısı Olğa Skrıpnıknıñ qayd etkenine köre, işğal etilgen Qırımda Rusiye akimiyeti qadınlarğa qarşı repressiyalarnı quvetleştire: sert ükümler, "devlet hainligi" ve "casuslıq" maddeleri, em de balalarnı alıp ketmek telükesi qullanıla. Hususan, siyasiy mabüslerge kerekli tıbbiy yardım kösterilmemesi kritik olıp qala, bu ise olarnıñ ayatlarını telükege oğrata.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
