Arsen İbrayimov, işğalciler tarafından "Noman Çelebicihan batalyonı davası"nda Rusiye Federatsiyasınıñ sert rejimli müslekesinde 10 yılğa qanunsız mahküm etilgen soñ, Omsk apishanesinde ağır bronhiya astması şeklini aldı. Qırımtatar resurs merkezi Ukrayina ombudsmanı Dmıtro Lubinetske muracaat etip, siyasiy mabüsniñ sağlıq vaziyeti kritik olğanı ve kerekli tibbiy yardım kösterilmegeni sebebinden onıñ deñiştirüv cedvellerine kirsetilmesine yardım etmege rica etti.
Qırımtatar Maaliy Merkeziniñ idarecisi Zarema Bariieva Facebookta bunı bildirdi.
Onıñ aytqanına köre, İbrayimovnıñ qorantası ümütsizdir, çünki Arsenniñ alı fenalaşa, apiste tedaviylenmesi ise kerçekten yoq.
"Arsenniñ diger cezası — apishanede alğan bronhiya astması oldı, o, er kün ilerley ve fenalaşa, neticesinde oğlan kritik alda buluna. Yaqın künleri Arsenniñ nefes aluvı daa zorlaşqanı belli oldı. Müstemlekeniñ ekimi bronhiya astması diagnozını qoydı, amma onı tedaviylegen bir şey yoq, dep bildirdi. Müstemlekede er altı ayda bir rentgen yapıla, ve bu hastalıqnen hasta, sağlıq vaziyeti boyunca tedaviylevni uyğunlaştıracaq ekim nezareti altında olmaq kerek. Arsen, tuvğanları tarafından berilgen nefes aluvnı stabilleştirgen mahsus ilâclarnı daa sıq qullanmağa başladı. Bu onı saqlap qala", — dep QRMniñ idarecisi qayd etti.
Bariievanıñ aytqanına köre, Omsknıñ sert ava ve tutuluv şaraiti Arsen içün ölüm telükesi ola bile.
"İmmunitetniñ zayıflaşması ve suvuq ava sebebinden suvuqlanma hastalıqları sıq rastkele. 45 adamnı köz ögüne alsaq, respiratsion hastalıq infektsiyasınıñ toqtatılmaz bir ketişatı bar. Arsenniñ soy-sopları bildireler ki, Omsknıñ sert ava şaraiti Arsen içün kelişmey ve onıñ qanunsız apis müddetini bu hastalıqnen keçirip olamaycağından qorqalar", — dep Bariieva qayd etti.
Uquq qorçalayıcı ukrayin ombudsmanı Dmıtro Lubinetsni ve halqara toplulıqnı İbrayimov ve diger Kreml mabüsleriniñ taqdirine diqqat ayırmağa ve esirlerni deñiştirüv cedveline kirsetmege çağırdı.
"Ukrayina ombudsmanı Dmıtro Lubinetske muracaat etip, "Noman Çelibicihan batalyonı davası"nıñ siyasiy mabüslerine ve olarnı deñiştirüv cedvellerine kirsetmek kerekligine cemaatnıñ diqqatını celp etmege isteyim, çünki vatandaşlarımıznıñ sınav ve işkenceleri insan areketinen alâqası yoq", — dep Bariieva qayd etti.
Hatırlatamız ki, 2014 senesinden başlap, Qırımtatar resurs merkezi Noman Çelebicihan adına batalyonda iştirak etkeninde qabaatlanıp eñ az 66 tutulğanını qayd etti: 19-ı — işğal etilgen Qırımda, 47-si — 2022 senesi kiçik aynıñ 24-nden soñ işğal etilgen Herson vilâyetinde.
Noman Çelebicihan adına batalyon — 2016 senesiniñ başında işğal etilgen Qırımnen memuriy sıñırda qamaçav vaqtında peyda olğan göñülli qırımtatar silâlı birleşmesidir. Batalyon Noman Çelebicihan — qırımtatar siyasetçisi ve cemaat erbabı, Qırım Halq Cumhuriyetiniñ birinci ükümet reisi, qırımtatar halqınıñ I-nci Qurultayınıñ teşkilâtçısı, Qırım, Litvaniya, Poloniya, Belorusiye musulmanlarınıñ birinci müftisi Noman Çelebicihannıñ şerefine adlandırıldı. 2022 senesi ilk yaz ayınıñ 1-nde Rusiye Yuqarı mahkemesi "Noman Çelebicihan adına qırımtatar göñülli batalyonı"nı terroristik teşkilât olaraq tanıdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
