"Simferopol — Aluşta — Yalta" yolunıñ rekonstruktsiyası içün işğalciler 164,37 gektarlıq ormannı kesmege planlaştıralar. 2024 senesi saban ayında Qırımnıñ cenübiy yalısında — Perevalnıy keçitinden Angar keçitine qadar — yol qurulğanda ağaçlarnıñ bir qısmı yoq etilgen edi. İşğalli Ekologiya nazirligi, RİA "Novosti Krım" Rusiye kütleviy haber agentliginiñ ricasına köre bildirdi ki, bütün ağaçlar Rusiye ordusınıñ ihtiyacları içün berildi.
RİA "Novosti Krım", işğalli Qırım Ekologiya nazirliginiñ cevabına esaslanıp, bunı bildirdi.
"2024 senesi saban ayında yol quruluvı vaqtında alınğan 2396,7 kubometr ağaç, mütenasip emir esasında Rusiye Federatsiyası Mudafaa nazirliginiñ ihtiyacları içün berildi. Qalğan tereklerniñ Rusiye Mudafaa nazirliginiñ ihtiyacları içün berilmesi de baqıla", — dep işğalli müessiseniñ cevabında bildirildi.
İşğalli akimiyet ormanlarnıñ bir qısmını ğayrıdan tikleycegini ve dağ yamaçlarını, yamaçnıñ qıyışlığı, topraq şaraiti ve yolnıñ qullanuv intensivligine bağlı olaraq, biomüendislik, geosintetik usullar ve mehanik manialarnıñ qoyulması usullarnen quvetleştirecegini bildirdi.
"Sarı şerit" areketiniñ vekilleri "Sevastopol — Yalta" yolunıñ yanında biñlernen terekniñ kesilgenini qayd etti. Olarnıñ malümatına köre, zarar körgen yerlerde tertipke ketirilgen tereklerniñ planları işğalciler tarafından muzakere etilmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
