18 yılğa apis cezasına mahküm etilgen Qırım siyasiy mabüsi Şaban Umerov Murmansktaki 17-nci tüzetüv müstemlekesinde ceza çeke. Onıñ apayı Zarema Umerova onı ziyaret etip, üç kün devamında şiddetli baş ağrılarından şikâyet etkenini bildirdi.
O, bunı Qırım birdemligine añlattı.
Onıñ qayd etkenine köre, üç künlik ziyareti vaqtında aqayı pek raatsızlanğan edi.
"O, [toplaşuv odasına] ilâclarnı, limonçıq aldı, episini içti. Baş ağrısı ne içün olğanı bilmeyim, evel de başı ağıra edi, amma bu qadar degil. Belki de basqı ya da başqa bir şey sebebinden. Amma o dey ki, iklim kelişmey, oksigen yetmey, yani oña er şey tesir ete. İlâclarni içip bile başı ağrıa edi", — dep Zarema Umerova ayttı.
Qadın şunı da qoştı ki, Şaban Umerov şimdi tikiş işhanesinde çalışa. Onıñ aytqanına köre, müstemlekede musulmanlarğa domuz etini bere ediler, şimdi ise domuz etini bermeyler.
Zarema Umerova qayd etti ki, Murmansk msyemlekesine yol, aqayınıñ evel bulunğan Yuqarı Uralğa yapqan yollarından daa zor oldı.
Bu sene oraq ayında qadın, onıñ aqayı mahkeme qararınıñ ağırlığı sebebinden ihtisasiy cedvelge alınğanını bildirdi. Onıñ yüksek qan basımı bar edi, onıñ içün ilâc ala edi, ve tişçige tiş protezleri içün muracaat etmek kerek edi.
Şaban Umerov aqqında ne bilemiz
Şaban Umerov 2019 senesi saban ayınıñ 27-nde Qırımda qırımtatarlarnıñ evlerinde keçirilgen tintüvlerden soñ tutuldı. Onıñnen beraber uquq qorçalayıcı organlarınıñ hadimleri daa 20-den çoq qırımtatar cemaat faalcisini tuttılar.
2022 senesi saban ayında Cenübiy bölge arbiy makemesi oña Rusiye Ceza kodeksiniñ 205.5 maddesine binaen 18 yıl apis cezasını berdi. Ükümge binaen, Şabanov beş yıl apishanede, qalğanını ise koloniyada keçirecek edi.
2023 senesi martnıñ 28-nde Apellâtsiya arbiy makemesi Cenübiy bölge arbiy makemesiniñ qararını deñiştirmedi.
Dava malümatına köre, qabaatlanğanlarnıñ elinde silâ, patlayıcı, arbiy yedekler yoq edi, olar terror areketini yapmağa planlaştırmay ediler ve başqalarnı terror areketlerine çağıra ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
