Bİİniñ mahsus hızmetçileri Qırımda 2 An-26 RF uçağını ve yalı RLSnı yoq ettiler

İlk küz ayınıñ 24-nde işğal etilgen Qırımğa keçirilgen ücüm vaqtında Ukrayina Mudafaa nazirliginiñ Baş istihbarat idaresiniñ (Bİİ) "Prımarı" mahsus bölüginiñ arbiy hızmetçileri eki Rusiye An-26 naqliyat uçağını yaqtılar, em radiolokatsiya stantsiyasını (RLS) urdılar, em de MR-10M1 "Mıs M1" yalı RLSnı urdılar.

İlk küz ayınıñ 25-nde Bİİ Facebook saifesinde bunı bildirdi.

"Ukrayina Mudafaa nazirliginiñ Bİİniñ "Prımarı" mahsus bölüginiñ ustaları vaqtınca işğal etilgen Qırım toprağında duşmanlarnıñ qıymetli maqsatlarını yoq etmege devam eteler", — dep beyanatta bildirildi.

Ukrayina istihbaratı qayd etti ki, Rusiye Federatsiyasınıñ Silâlı quvetleriniñ Qırımdaki ğayıpları aqqında Ukrayina Silâlı quvetleriniñ Baş ştabınıñ ilk küz ayınıñ 24 künü malümatında aytıla. Hususan, anda eki uçaqnıñ yoq etilüvi qayd etile. Umumen istilâ başlağanından berli 426 Rusiye arbiy uçağı yoq etildi.

Hatırlatamız ki, ilk küz ayınıñ 24-nde geceden sabağa qadar işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) patlamalar eşitildi. İşğalli akimiyet ava mudafaasınıñ sabağa qadar çalışqanını bildirdi. Aynı vaqıtta yerli sakinler "Belbek" ve "Qaçı" arbiy ava limanları civarında patlamalarnı eşitkenler.

İlk küz ayınıñ 22-nde gece işğal etilgen Sevastopolda (Aqyarda) "Qaçı" ve "Belbek" arbiy ava limanları yanında patlamalar eşitildi, dep yerli sakinler ayttılar. İşğalciler şeer civarlarında ve Qaçı rayonında altı UUA tüşürilgenini bildirdiler. İlk küz ayınıñ 23-nde saba Qırım köprü de aman-aman bir saatke qapatıldı.

Birazdan Ukrayina Silâlı quvetleriniñ Baş ştabı, "Qaçı" arbiy ava limanında eki uçaqnıñ zarar körgenini tasdıqladı.

Evel, ilk küz ayınıñ 21-nde işğal etilgen Qırımda Yalta rayonınıñ Foros köyünde üç insan elâk oldı, 16 kişi yaralandı. "Foros" şifahanesi ve mektep zarar kördi, dep işğalli Qırım yolbaşçısı Sergey Aksönov bildirdi.

Hatırlatamız ki, ilk küz ayınıñ 21-nde işğal etilgen Qırımda Ukrayina Mudafaa nazirliginiñ "Prımarı" mahsus bölüginiñ arbiy hızmetçileri tarihta ilk sefer eki Be-12 "Çayka" Rusiye amfibiya uçağını yoq ettiler, em de Mi-8 çoq maqsatlı Rusiye vertolötını urdılar.

Bundan evel de Bİİ bildirdi ki, ilk küz ayınıñ 21-nde "Prımarı" mahsus bölügi işğal etilgen Qırımda işğalcilerniñ üç Mi-8 çoq maqsatlı vertolötını ve qıymetli 55J6U "Nebo-U" Rusiye radiolokatsiya stantsiyasını urdı.

Читати ще