2014 senesinden başlap Qırım limanlarını çetel gemileriniñ qullanuv yasağını bozıp, Panamanıñ bayrağı altında Heng Yang 9 adlı Çin yük gemisi vaqtınca işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) limanına eñ az üç kere kirdi.
Financial Times, ukrayin memurlarına atfı etip, bu aqqında yazdı.
Neşirniñ malümatına köre, Guangxi Changhai Shipping Company Çin şirketine ait Heng Yang 9 gemisi ilk yaz ayınıñ 19-22 künleri Sevastopolda (Aqyarda) bulundı. Arman ayınıñ 15-nde o, 101 konteynerni yüklemek içün limanğa kirmege rica etti.
Ukrayina memurlarınıñ aytqanlarına köre, gemi işğal etilgen limanğa eñ az üç kere keldi. Aynı vaqıtta ilk küz ayında o, öz marşrutlarını gizlemege tırışqan edi, sahte koordinatlarnı bildirip, sanki Rusiyeniñ "Kavkaz" limanına kete eken. Amma uydu resimleri onı Sevastopolda (Aqyarda) qayd etti.
FT qayd ete ki, Çin Rusiyege qarşı ğarbiy sanktsiyalarğa qoltutmasa da, onıñ ticaret gemileri evelden Qırım limanlarına kelmege istemey edi.
Ukrayina prezidentiniñ sanktsiyalar siyaseti meselelerinden vekâletlisi Vladıslav Vlasük neşirge bildirdi ki, Ukrayinadaki Çin elçihanesi bu vaqianı Çin Tış işler nazirliginiñ temsilcilerinen muzakere etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
