"Ekinci Canköy gruppası" davasınıñ iştirakçisi, siyasiy mabüs Leman Zekeryayev Rostov-na-Donu SİZOsından Novoçerkassk şeeriniñ 3-nci SİZOsına avuştırıldı.
Onıñ apayı Zera Cemileva "Qırım birdemligi"ne bunı bildirdi.
İlk küz ayınıñ başında o, aqayınıñ bulunğan yerini ögrenmek içün muracaat yolladı.
"Menim qoluma onıñ Novoçerkasskta bulunğanını bildirgen mektüp keldi", — dep Lemannıñ apayı tarif etti.
Hatırlatamız ki, 2024 senesi qara qış ayınıñ 24-nde Canköy rayonında quvetçiler altı erkekni tutıp, Simferopolğa (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adke) alıp kettiler. Tedbir alınğan soñ er kesni Simferopoldaki (Aqmescitteki) SİZO-1ge yerleştirdiler.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı. Söz Ekrem Kroş, Ayder Asanov, Leman Zekeryayev, Osman Abdurazakov ve Refat Seydametov aqqında yürsetile.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
