İşğalciler, Herson vilâyetinden Amina Kadır ve Elmira Umerovanı Noman Çelebicihan adına qırımtatar göñülli batalyonında iştirak etkeninde qabaatlaylar. 2022 senesi ilk yaz ayınıñ 1-nde Rusiye Yuqarı mahkemesi onı "terror teşkilâtı" olaraq tanıp, Rusiye Federatsiyasında faaliyetini yasaq etti.
Facebookta Qırımtatar resurs merkeziniñ idare reisi ve Qırımtatar Milliy Meclisiniñ azası Eskender Bariiev bunı bildirdi.
"Noman Çelebicihan batalyonı davasında işğalciler tek erkeklerni taqip eteler, dep tüşünseñiz, pek yañlışırsıñız. Keçenlerde Geniçesk rayonından eki qırımtatar qadını Amina Kadır ve Elmira Umerovanıñ ğıyabiy apis etilgeni aqqında eşittim, olar bu dava boyunca şartlı apis müddetlerini aldılar", — dep Bariiev bildirdi.
Eskender Bariiev, yuqarıda añılğan "dava" çerçivesinde ruslarnıñ qırımtatarlarğa qarşı sistematik ve peşin fikirli olğanlarını qayd ete. Hatırlatamız ki, 2014 senesinden başlap, Qırımtatar resurs merkezi Noman Çelebicihan adına batalyonda iştirak etkeninde qabaatlanıp eñ az 66 tutulğanını qayd etti: 19-ı — işğal etilgen Qırımda, 47-si — 2022 senesi kiçik aynıñ 24-nden soñ işğal etilgen Herson vilâyetinde.
"Qırımnıñ ticaret qamaçavına alâqası olğan ya da olmağan, yanından keçken, baqıp keçken, bir nefesnen nefes alğan, qırımtatar halqına ait olğan ve Herson vilâyetinde yaşağan — bu endi "Noman Çelibicihan batalyonı davası" çerçivesinde tutulıp alınmaq içün yeterlidir. İşğalciler vatandaşlarımıznı daa ne qadar tutacaqlarını soñ ögrenirmiz, amma elimizde olğan malümatqa köre, işğalciler 250 insannı tutmaq niyetindelerdir", — dep Bariiev qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
