Qırımnıñ işğalli Canköy rayon mahkemesiniñ "mahkemecisi" Olena Nikolayeva, 60 yaşındaki, dörtünci nesilli "Yehova şaatı" Viktor Ursunı 6 yılğa üküm etti. Onı "mahkeme" zalında tutıp aldılar. Onı "aşırıcı teşkilâtınıñ faaliyetini teşkil etkeni"nde qabaatladılar.
İlk küz ayınıñ 9-nda "Yehova Şaatları. Rusiyedeki uquqiy vaziyet" portalı bu aqqında haber berdi.
"Men cinayetçi ya da aşırıcı degilim. 50 yıldır Canköyde yaşayım, 40 yıldır bir müessisede maşna kesicisi olıp çalışam. Men ana-babama baqam", — dep Ursu ayttı.
Din kişisiniñ advokat onı "işçi ziyalılardan pek yahşı bir insan" olaraq tasvirley, onıñ iş beceriklerine ihtiyacını resmen tasdıqlağan şirkette iş bericiniñ "mükemmel" bir kösterüvi bar.
Portalnıñ malümatına köre, Qırımda bu din cemiyetiniñ 32 vekili repressiyalarnıñ qurbanı oldı, olardan 13-ü 6 yıl ya da daa ziyade müddetke müstemlekede buluna.
Portal hatırlattı ki, Ursuğa qarşı repressiyalar 2023 senesi oraq ayında, Rusiye quvetçileri onıñ evini tintken soñ başlandı. Bir yıl ev apsinde olğanda, oña, 30 yıldan berli ömür arqadaşı olğan Marınanen qonuşmağa yasaq etildi.
Dava, ibadetlerniñ audio qaydılarından ibaret edi. "Gromov" adlı gizli şaat, Ursunıñ zorbalıq ya da qanunsızlıqqa çağırmağanını tasdıqladı.
Daa evel işğal etilgen Qırımda Rusiye quvetçileri Zaprudne köyünde yaşağan 52 yaşında adamnı tutıp, onı Rusiyede yasaq etilgen "Yehova şaatları" diniy teşkilâtında iştirak etkeninde qabaatladılar.
"Yehova şaatları"nıñ taqip etilüvi aqqında ne bilemiz
2017 senesi Rusiye bu diniy teşkilâtnı aşırıcı olaraq tanıdı ve onıñ faaliyetini, şu cümleden işğal etilgen Qırımda da, yasaq etti. 2018 senesi "Yehova şaatları"nıñ taqip etilüvi başlandı. Avropa insan aqları mahkemesi (AİSM) Rusiye ve işğal etilgen Qırımda "Yehova Şaatları" teşkilâtınıñ yasağını qanunsız dep tanıdı. "Yehova şaatları"nıñ resmiy saytında berilgen malümatqa köre, 2024 senesi arman ayına qadar Qırımda bu diniy teşkilâtnıñ doquz vekili apiske alındı.
Hatırlatamız ki, Suspilne Qırımnıñ Youtube kanalında "Din nezaret altında. Yehova Şaatları" videosını baqmaq mümkün. Anda Qırımda diniy teşkilâtnıñ taqip etilüvi aqqında aytıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
