İşğal etilgen Qırımda Rusiye quvetçileri Zaprudne köyünde yaşağan 52 yaşındaki adamnı tutıp, onı Rusiyede yasaq etilgen "Yehova şaatları" diniy teşkilâtında iştirak etkeninde qabaatladılar.
RİA "Novosti Krım", işğalli FSBge atfı etip, bunı bildirdi.
FSBniñ malümatına köre, o, "Yalta ve Aluşta şeherlerinde toplaşuvlarnı idare ete, edebiyat tarqata ve Yehova Şaatlarınıñ fikirlerini teşviq ete edi". Quvetçiler tintüv vaqtında "yasaq etilgen malümat" tapqanlarını bildireler. Tutulğan adamnıñ adı ve soyadı aydınlatılmay, onıñ açıq izaatları yoq.
" Rusiyede Yehova şaatları idare merkezi" diniy teşkilâtı ve onıñ terkibine kirgen yerli diniy bölükleri, diniy duşmanlıqnı qozğaycaq, vatandaşlarnıñ diniy munasebetine köre ayırıluvını, üstünligini ve yaramaylığını teşviq etecek edebiyatnıñ tarqatıluvınen bağlı aşırıcı faaliyeti içün yoq etildi", — dep işğalli FSBniñ haberinde qayd etildi.
"Yehova Şaatları"nıñ taqip etilüvi aqqında ne bilemiz
2017 senesi Rusiye bu diniy teşkilâtnı aşırıcı olaraq tanıdı ve onıñ faaliyetini, şu cümleden işğal etilgen Qırımda da, yasaq etti. 2018 senesinde ise, "Yehova Şaatları"nıñ taqip etilüvi cinaiy davalar çerçivesinde başladı. Avropa insan aqları mahkemesi (AİAM) Rusiye ve işğal etilgen Qırımda "Yehova Şaatları" teşkilâtınıñ yasaq etilmesini qanunsız dep tanıdı. "Yehova Şaatları"nıñ resmiy saytınıñ malümatına köre, 2024 senesi arman ayına qadar Qırımda bu diniy teşkilâtnıñ doquz vekili apiste buluna.
Hatırlatamız ki, Suspilne Qırımnıñ Youtube kanalında "Din nezaret altında. Yehova Şaatları" yayınını seyir etmek mümkün. Anda Qırımda diniy teşkilâtnıñ taqip etilüvi aqqında aytıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
