Bir vaqıtları o, simfonik orkestrniñ azası edi ve Meksikada büyük turnenen oğraşa edi. Şimdi onıñ muzıka qulaqları cebede yardım ete, kemane yerini ise silâ aldı. "Muzıkant" — onıñ lâğabıdır. Ukrayina Mudafaa nazirliginiñ "Tımur mahsus bölügi"niñ erkânında "Bratstvo" bölüginiñ mahsus hadimi Suspilne Qırımğa büyük sanadan cenk vazifeleri içün nasıl ketkenini ve öz qararından ne içün peşman olmağanını tarif etti.
"Muzıkant" lâğabı oña tesadüfen berilmedi. Tınç ayatında kemane ve alta çalğan edi, ve tolu miqyaslı istilâdan evel büyük bir seyaatqa azırlanğan edi.
Yataqhanedeki qomşum Meksikalı edi. Biletler içün para topladıq, er şeyni azırladıq, spontsorlarnı taptıq, sanalarnı ayırttıq. Bütün Meksikada kontsertler yapacaq edik. Ve cenk başlandı. Yoldaşım şunı dedi: "Mennen beraber ket". Men böyle otura edim, tüşüne edim: "Yoq, mında dostlarım bar. Olar cenkteler, men nasıl ketecegim?" Men red ettim, o ise ketti. Böylece, Meksikada büyük turnem lâğu etildi. Amma, kerçekten aytsam, iç de peşman degilim. Mında da eglence bar. Mında da turlarım bar", — dep "Muzıkant" añlattı.
"Muzıkant" — duşmannıñ arqa cebesinde vazifege tayin etilgen mahsus hızmetçi. Qardaşlarınen beraber Herson ve Zaporijjâ vilâyetleriniñ işğal etilgen topraqlarına kete ediler, 2023 senesi ise Qırımğa deñizde birinci sefer yaptılar. O vaqıt ukrayin istihbaratçıları yarımadada işğalcilerniñ RLSnı yoq ettiler ve qıtağa muvafaqiyetnen qaytıp oldılar. "Muzıkant" içün Qırım — tek cenk vazifesi degil, balalıq hatırasıdır.
"Bir vaqıtlar babam Sudaqta bir daire aldı. Biz, ailemiznen beraber anda raatlanmağa barğan edik, ruslar istilâ etkenine qadar. Anda Ceneviz qalesi bar, babamnen anda sıq-sıq barıp yürgen edik. Bu, menim dağğa çıqqan birinci seferim edi. Qırım tabiatı — inanılmaz bir şeydir. Saba saat dörtte uyanıp, deñizden çıqqan küneşke baqsañ — bu inanılmaz bir şey", — dep arbiy hızmetçi hatırladı.
Ruslar yarımadanı zapt etkende, oğlan 14 yaşında edi. Ana-babası işğal ne olğanını añlattılar.
"Men ne içün Qırımğa barmaymız dep soradım. Olar: "Şimdi olmaz, anda Rusiye arbiy hızmetçileri bar. O yerge barmaq telükelidir. Maşnanı, ukrayin timsalleri sebebinden yaqa bileler". Biz bu yerlerge endi barmaymız", — dep ayttı o.
Qırımğa "Muzıkant" tek 2023 senesi qaytıp keldi. Onıñ aytqanına köre, komandanlıq reydde iştirak etmege teklif etkende, o, birden razı oldı. Bu, onıñ içün tek bir cenk vazifesi degil edi.
"Qırımda yaşağan ve Rusiye rejimine öz küçünen qarşılıq köstermege tırışqan insanlar içün bu bir ruhlandıruv. Bu, olar içün bir ruhlandıruv kibi edi ve erte ya da keç bizQırımğa kelecekmiz", — dep "Muzıkant" qayd etti.
Şimdi çalğı aletleri çalmay. Amma, onıñ aytqanına köre, onıñ muzıka eşitmesi cenk vazifelerinde yardım ete.
"Erkeklerniñ eşitmey bilecekleri şeylerni siz anda eşitesiñiz. Yaramay bağ ola, ve bir qaç söz añlaşılmay qala, ve siz bu sözlerge tutunıp qalasıñız. Sen olarnı eşittiñ, olar eşitmediler. Ve sen bu sözlerge köre, areketler yapa bilesiñ. Dronnıñ uçqanını ya da yaqınlaqanını birinci eşite bilesiñ. Amma bütün bu vazifelerden soñ eşitme qabiliyetim biraz fenalaştı", — dep arbiy hızmetçi tarif etti.
O, kelecek aqqında çoq aytmay, çünki cenk devam ete. Amma qorantası ve dostlarınen beraber azat etilecek Qırımğa barmağa, Sudaq ve Yaltağa qaytmağa arzu ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
