İşğalciler tarafından 16 yıl 8 ay apis cezasına mahküm etilgen Qırım siyasiy mabüsi Marlen Mustafayevni Rusiye vatandaşlığından marum ettiler. O, Rusiyeniñ Krasnoyarsk vilâyetindeki 6-nci tüzetüv müstemlekesinde tutula. Bu endi ruslarnıñ sistematik bir ameliyatı oldı, Kremlniñ Qırımdan mabüsleri apiske alınğan soñ bile evlerine qaytıp olamaylar.
Qırımtatar resurs merkeziniñ (QRM) idarecisi Zarema Bariieva Facebook saifesinde bunı bildirdi.
"2025 senesi ilk yaz ayınıñ 11-nde mahsus bölükte oña qarşı "Rusiye Federatsiyası vatandaşlığınıñ toqtatılması" aqqında vesiqalar berilgenini bildirdiler", — dep bunı tek ilk küz ayınıñ 8-nde ögrendi.
Uquq qorçaşayıcılarnıñ malümatına köre, Mustafayev maneviy ve fizikiy basqı, milliy ve diniy sebeplerden aşağılavlarğa oğray, em de yetersiz aşnen bağlı sağlıq meseleleri bar.
"Şu cümleden, memuriyet onı rus tilini bilgenine baqmadan, onı rus tilinden imlâ yazmağa mecbur etmege tırışa edi, ve red etüvi "zarar" olaraq qabul etile edi", — dep Bariieva qayd etti.
O şunı da qoştı ki, Nasrulla Seydaliyev, Lenur Seydametov ve Ekrem Mamedovnıñ da aynı vaziyeti bar. Vesiqalarda azatlıqtan soñ sürgünlik ve 10 yılğa Rusiyege kiriş yasağı qayd etile.
"Bu davalarnıñ episi, vatandaşlıqtan marum etüv, basqı mehanizmi olaraq qullanılğan ve "işançsız" vatandaşlarnı yoq etken melez sürgünlikniñ misalleridir", — dep Bariieva qayd etti.
O, demokratik memleketlerniñ parlamentlerini 1944 senesi qırımtatarlarnıñ sürgünligini genotsid olaraq tanımağa çağıra ve sürgünlik esnası bugün de devam etkenini qayd ete.
Bundan evel Zarema Bariieva bildirdi ki, Qırımdaki işğalciler, Vladimirskte qanunsız apis cezasını çekken qırımtatar Ekrem Mamedov Rusiye vatandaşlığını coydı. Qanunsız apis müddeti bitken soñ, ruslar onı Rusiye Federatsiyasından sürgün etip, işğal etilgen Qırımğa qaytmasını yasaq ete bileler.
Qırım işğal etilgen soñ Rusiye sakinlerge pasportnı zornen bermege mecbur etti, olarnı basqı aleti olaraq qullana: yazğanları, tenqit etkenleri ya da cenkleşmege istemegenleri içün vesiqalarnı alıp taşlay bileler, şahıslarnı ise sürgün ete ya da apiske ala bileler. Devlet duması Qırım sakinlerini vatandaşlıqtan marum etüv yasağını ne içün endi kirsetti ve bu, Kremlge sadıq olmağanlarğa basqı yapmağa nasıl imkân bere — "PRO Qırım" yañı videosından ögreniñiz.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
