Salavatnıñ (Başqırtistan Cumhuriyeti) 16-ncı tüzetüv müstemlekesinde tutulğan siyasiy mabüs Üzeir Abdullayev ceza izolâtorına (ŞİZO) yollanıldı.
Oğlunı körmege planlaştırğan anası Dilâra Abdullayeva öz içtimaiy ağlarında bunı bildirdi. Adamğa 15 kün berildi.
Qadın, Üzeirniñ ŞİZOğa yerleştirilmesini kiçik oğlu Teymur Abdullayevge yapılğan basqı şikâyetlerinen bağlağanını tüşüne. Onı da Salavatta tutalar, amma TM-2 adlı diger müstemlekede.
"Müstemlekeniñ yolbaşçısı maña ayttı ki, apis cezasını deñiştirmege imkânı yoq, çünki prokuror teşkerüvi bu emir aqqında endi bilgen edi, amma ekimge oğlumnıñ sağlığını er kün nezaret etmege avale etecek ve kerek olsa, onı acele tibbiy bölükke avuştırırlar", — dep haberde qayd etildi.
"Qırım birdemligi"niñ yazğanına köre, 2023 senesi baarde Üzeir Abdullayevni soñki sefer ŞİZOğa yollağan ediler, onı ekimniñ tevsiyesinen çıqarğan ediler.
Bundan da ğayrı, TM-16da qırımtatarğa "alınğan yürek qusurı" diagnozı qoyulğan edi.
İlk küz ayınıñ 20-ne qadar siyasiy mabüs ŞİZOda qalacaq. Müstemlekeniñ müdiri ilk küz ayınıñ 22-nde, Bazarertesi künü, anasına oğlunı körmege söz berdi.
Hatırlatamız ki, evel Dilâra Abdullayeva kiçik oğlu Teymur Abdullayev qanunsız sürette apishanege qapatılğan Başqırtistan müstemlekesiniñ yolbaşçısınen şahsen subetleşti. Müstemlekege barğanda, oña, ilk küz ayınıñ 5-nde Teymur ŞİZOdan STŞe (sert tutuv şaraiti) avuştırılacağı ve ilk küz ayınıñ 8-nde onı körmek mümkün olacağı aqqında söz berdiler.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
