Qırım siyasiy mabüsi, "Hizb ut-Tahrir davası"niñ mabüsi Teymur Abdullayevanıñ anası, kiçik oğlu qanunsız sürette apiske alınğan Başqırtistandaki müstemlekeniñ yolbaşçısınen şahsen laf etti. Müstemlekege barğanda, oña, ilk küz ayınıñ 5-nde Teymur ŞİZOdan SUSğa (sert tutuv şaraitine) avuştırılacağı ve ilk küz ayınıñ 8-nde ise onı körmege imkânı olacağı vade etildi.
Dilâra Abdullayeva Facebookta bu aqqında yazdı.
Teymur Abdullayev 2019 senesi Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde iştirak etkeninde qabaatlanıp, 16 yıl ve 6 aylıq apiske ve 1 yıl 4 aylıq memuriy nezaret cezasına mahküm etildi.
Bundan evel Teymur Abdullayevniñ anası, müstemleke hadimleri onı rejim bozuluvını numayış etmege mecbur etkeni, apishaneniñ hadimlerinden basqığa oğrağanı, bundan da ğayrı, 1020 künden berli ceza izolâtorında (ŞİZO) tutılğanı aqqında tarif etken edi. Şimdi o, küçük oğlu qanunsız sürette apiske alınğan Salavat şeerindeki (Başqırtistan Cumhuriyeti) 2-nci apishanesiniñ yolbaşçısı ile "uzun ve ağır subet" keçirgenini qayd etti.
"Oğlum ile körüşüv ilk küz ayınıñ 8-nde berildi. Teymur ilk küz ayınıñ 5-nde aqşam STŞe avuştırılacaq, bundan soñ raatlıq künleri olacaq, ve bazarertesi künü men kiçik oğlumnı körecegim. Müstemleke yolbaşçısı şahsen oña beş kilogramm yükni toplamağa izin berdi", — dep qadın yazdı.
Bundan da ğayrı, qadın Rusiye Federatsiyasında qanunsız ceza alğan büyük oğlu Üzeirnen körüşip, oña yayınnı toplamağa niyetlengenini qoştı. O, Üzeyirnen resmen körüşmege ruhsetlengenini, amma kiçik oğlu ile körüşken soñ oña barıp, "o nasıl olğanını, onıñ nasıl körünegini ve onıñ ağa-qardaşı Teymur ne aytqanını" añlatacağını qayd etti.
Beş yıldan ziyade apiste yatqan vaqtında Teymur tahqiqat izolâtorında 1021 künden ziyade bulundı. "Qırım birdemligi"niñ haber etkenine köre, onı muntazam sürette "içtimaiy sebeplerden" — meselâ, namaz vaqtında müstemleke yolbaşçısını selâmlamadığı içün — izolâtsiya ile cezalandıralar.
Hatırlatamız ki, 2016 senesi orta küz ayında Üzeyir ve Teymur Abdullayevlerniñ tuvğanları daa üç qırımtatar ile beraber apiske alındı. Olarnı "Hizb ut-Tahrir" islâm siyasiy firqasınıñ faaliyetinde qabaatladılar.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
