14 yılğa mahküm etilgen qırımtatar siyasiy mabüsi Bilâl Adilov endi 10 aydır Ruslar tarafından 1-nci Qızıl (Tiva Cumhuriyeti) tüzetüv müstemlekesiniñ kamera türlü odada (KTO) tutula. Rusiye Federatsiyasınıñ qanunlarına binaen, adamlarnıñ böyle rejimli binalarda 6 aydan ziyade devamlı bulunması yasaq etile.
Onıñ apayı Gülnara Adilova "Qırım birdemligi"ne bunı bildirdi.
Qırımtatar siyasiy mabüsi Bilâl Adilovnıñ KTOda bulunmasınıñ sebebi onıñ apayına añlatılmadı. Qanunğa binaen, adam mabüslerni yarım yıldan ziyade KTO kibi rejimli binada tutmaq mümkün degil. Qadınlarnı 3 aydan ziyade degil.
"Müstemlekege muracaat ettim, mektüp yazdım, telefon ettim, amma kimse cevap bermedi", — dep Gülnara Adilova tarif etti.
Bilâl Adilov aqqında ne bilemiz
Bilâl Adilov — qırımtatar faalcisi, 6 balanıñ babası, diniy erbap. Apiske alınğanına qadar bir qaç yıl devamında o, qırımtatar halqınıñ cemaat ayatında faal iştirak ete edi, mahkeme oturışlarına, tintüvlerge qatnay, siyasiy mabüslerniñ qorantalarına yardım ete edi.
2019 senesi saban ayınıñ 27-nde onı Simferopolnıñ (Aqmescitniñ) Stroğanivka ve Kamyanka mikrorayonlarından 24 qırımtatar cemaat faalcisinen beraber yaqaladılar. O, Rusiyede terrorcı sayılğan "Hizb ut-Tahrir" musulman siyasiy firqasınıñ merkezinde iştirak etkeninde qabaatlandı.
2022 senesi mayısnıñ 12-nde Cenübiy bölgeniñ arbiy mahkemesi Bilâl Adilovnı sert rejimli müstemlekede 14 yılğa üküm etti. Davanın diger mabüsleri — Tofik Abdulgaziyev, Vladlen Abdulkadırov, İzet Abdullayev ve Mecit Abdurrahmanov — er biri müstemlekede 12 yılğa üküm etildi. Advokatlarnıñ istinaf şikâyetleri qanaatlendirilmedi, ve 2024 senesi arman ayında kassatsiya mahkemesi ükümni tasdıqladı.
2024 senesi Bilâl Adilovnı Tiva Cumhuriyetine, Qızıl şeeriniñ tüzetüv müstemlekesine etap ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
