Rusiye quvetçileri, işğalciler tarafından 14 senege maküm etilgen qırımtatar Bilâl Adilovnı 1. Tıva apishanesine etap ettiler. Siyasiy mabüsniñ etapınıñ başlanğanı aqqında haber arman ayınıñ 23-nde peyda oldı. Bundan soñ o, 1. SİZOda kassatsiya şikâyet oturışında iştirak etti, soñra ondan iç bir haber kelmedi.
"Qırım birdemligi" cemaat teşkilâtı, siyasiy mabüsniñ apayı Gülnara Adilovağa esaslanıp bunı bildirdi.
Qadınnıñ aytqanına köre, berim ayınıñ başında o, siyasiy mabüs tutulğan terbiye müstemlekesinde mektüpler yazmağa başladı, Federal Cezalandıruv hızmetiniñ qabul ve nevbet bölügine telefon etti, amma aqayınıñ müstemlekege ketirilgenine dair resmiy bir tasdıq almadı.
Orta küz ayınıñ 23-nde Gülnara siyasiy mabüsniñ bulunğan yerini ögrendi — o, başqa müstemlekege etap etilgeni aqqında qısqa mektüp yazdı.
"Eki ay devamında bir şey belli degil edi. Adliyecilerniñ tevsiyelerine muracaat ettik, lâkin cevapları alâ daa yoq", — dep tarif etti Gülnara Adilova.
O şunı da qoştı ki, aqayınnı qıdıruv vaqtında o, insan aqları cumhuriyet ombudsmanınıñ adından prokurorlıqqa arizalar yolladı, amma ne adiy, ne de elektron mektüp vastasınen oña kimse cevap berdi. Moskvadan etap aqqında resmiy malümat kelmedi.
Daa soñra, aqayınıñ mektübini alğan soñ, qoranta Bilâl Adilovğa cevap yolladı. Amma onı alıp-almağanı belli degil.
Telegram, WhatsApp ve Facebookta Suspilne Qırım haberlerine abune oluñız
