Ukrayinada Rusiye esirliginden azat etilgen vatandaşlarnıñ mesken aqqı yerine ketirilmey. Bunı Kreml siyasiy mabüsleriniñ tuvğanları birleşmesiniñ azırlağanı "Başı üstünde dam olmağan" analitik mektübiniñ müellifleri bildireler.
Vesiqa 381 topraq cemiyetiniñ tedqiqat neticelerini çıqara, — dep birleşmeniñ saytında qayd etildi.
Tedqiqat neni kösterdi?
381 cemiyetniñ soravı şunı kösterdi:
- 8%niñ içtimaiy evleri bar;
- cemiyetlerniñ 86%iniñ iç bir programması yoq;
- 2 cemiyet (0,5%) azat etilgenler içün mahsus tedbirlerniñ olğanını tasdıqladı.
Adamlar eki qat sıqıntılı alda qaytıp keleler: cenk cinayetleriniñ qurbanları ve aynı zamanda devlet içinde alınğanlar. Mesken aqqı qanunda qayd etilgen, amma ameliyatta o yerine ketirilmey, — dep teşkilât reisi İğor Kotelânets qayd etti.
Birleşme, farqlı seviyedeki akimiyet organları içün de tevsiyeler azırladı.
Devlet akimiyet organları içün:
- 495-nci qararına deñişmeler kirsetip, azat etilgen vatandaşlarnı ilk kategoriya olaraq belgilemek;
- meskün programmasını azırlamaq ve cemiyetlerge olarnı amelge keçirmek içün açıq talimatlar bermek.
Yerli öz-özüni idare etüv organları içün:
- azat etilgen şahıslarnı ayrı kategoriya olaraq qayd etmek;
- olarnı yerli mesken programmalarına kirsetmek;
- yedek binalarını qullanmaq ve içtimaiy mesken fondlarında imtiyazlarnı belgilemek.
Halqara donorlar ve ortaqlar içün:
- içtimaiy yardımnen muvaqqat mesken programmalarınıñ maliye etilmesini desteklemek;
- mevcut binalarnı vaqtınca mesken içün tamir etmege yatırım yapmaq;
- devletke bu aqqını amelge keçirmek içün basqı quvetleştirgen adliye teşebbüslerini maliye etmek.
Ükümet vekilleri izaat bermediler. Tedqiqat mektübiniñ taqdimi vaqtında, muayyen cemiyetlerniñ müsbet adiseleriniñ misalleri de ketirildi.
"Zaporijjâ vilâyetinde zarar körgenlerge 50 biñ ğrıvnâ bir kerelik ödeme kirsetildi. Amma bu yeterli degil. Ayrı bir devlet programması ve meskenniñ kerçek maliye etilmesi kerek", — değ Zaporijjâ VAMniñ içtimaiy inkişaf idaresiniñ reberi Viktoriya Ğerasimenko bildirdi.
Hatırlatamız ki, oraq ayınıñ 28-nde Ukrayina prezidenti Volodımır Zelenskıy, cenk başlağanından berli 5857 insan, deñiştirüvlerden tış ise — daa 555 insan esirlikten azat etilgenini bildirdi.
Çiçek ayında İnkişaf nazirligi bildirdi ki, Ukrayinada vaqtınca işğal etilgen Qırımdan devlet içinde alınğan kişilerniñ 1 million 300 biñ qorantasını meskennen temin etmek kerek. Umumen, 2 million 800 biñ insan DAK statusına maliktir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
