"Hizb ut-Tahrir davası"nıñ "ekinci Canköy gruppası"nıñ 14 yılğa mahküm etilgen siyasiy mabüsi Halil Mambetovnı Taganrognıñ 2-nci SİZOsına etap ettiler.
"Qırım birdemligi", onıñ tuvğanlarına atfı etip, bunı bildirdi.
"Olarnıñ aytqanlarına köre, 70 yaşındaki qırımtatar arman ayınıñ 21-nde ketirildi. O, sekiz kişilik kamerada buluna, yüksek qan basımından şikâyet ete ve "Kardiomagnil" ilâcına muhtac. SİZOda adam, oña basqı yapılmağanını, fizikiy küç qullanılmağanını bildire, amma şimdilik telefon etmege ve qorantasınen uzun müddet körüşmege aqqı yoq", — dep haberde qayd etildi.
Hatırlatamız ki, bu sene çiçek ayında Cenübiy bölgeniñ arbiy mahkemesi Mambetovnı 14 yılğa mahküm etti — ilk dört yılını apishanede, qalğanını ise sert rejimli müstemlekede keçirecek.
"Ekinci Canköy gruppası" davasınıñ altı mabüsi "Hizb ut-Tahrir" firqasınıñ faaliyetinde iştirak etüvde ve akimiyetni zorbalıqnen zapt etüvge azırlanuvda qabaatlandı.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı. Söz Ekrem Kroş, Ayder Asanov, Leman Zekeryayev, Osman Abdurazakov ve Refat Seydametov aqqında yürsetile.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
