İşğal etilgen Qırımda yarımada sakinlerine qarşı basqılar dalğası devam etmekte. Rusiye havfsızlıq küçleri içtimaiy ağlarda ukrain tarafdarı fikirleri içün adamlarnı tutalar, olarnı "satqınlıq", "ekstremizm" ve "terrorizmni aqlavı"-nda qabaatlaylar.
Suspilne Qırım, keçken afta içinde yarımada sakinlerine qanunsız tutuvlar ve çıqarılğan cezalar aqqında umumiy malümat azırladı.
İşğal etilgen Sevastopolda "mahkeme" yerli sakinni "devlet hainligi" içün 14 yılğa üküm etti
İşğal etilgen Sevastopolda (Aqyarda)Rusiye imperatorlığı ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adı "mahkeme" yerli sakinni "devlet hainligi"nde qabaatlap, üküm çıqardı. O, sert rejimli müstemlekede 14 yılğa üküm etildi, bir yılğa azatlıq sıñırlandı ve 200 biñ ruble para cezasını aldı.
İşğalli tahqiqatnıñ versiyasına köre, 2024 senesi adam "Ukrayina mahsus hızmetleriniñ vekillerine Rusiye Qara deñiz flotunıñ gemileri ve Rusiye milliy gvardiyasınıñ vertolötlarınıñ fotoresimlerini ve videolarını WhatsApp messenceri vastasınen bergen edi".
Bundan ğayrı, işğalli prokurorlıq qoştı ki, aynı şu devirde o, Ukrayina mahsus hızmetleri tarafından idare etilgen Telegram kanalına qoşulğan. O, bu kanalğa ve öz "çıqaruvçısı"na "Rusiye milliy gvardiyasınıñ orduları helikopterleriniñ yerleştirilüvi ve areket etüvi aqqında videolarnı yolladı".
İşğalciler, FSB binasına patlayıcınen tolu ikona ketirgen qadınnı tuttılar
İşğal etilgen Qırımda işğalli FSB binasına patlayıcı cihaz qoyulğan ikonanı ketirgen qadın tutuldı.
İşğalli tahqiqatnıñ versiyasına köre, onı "Ukrayina havfsızlıq hızmeti" aldap işke celp etti. Volgograd vilâyetinden kelgen qadın, "aldatıcılar hırsızlağan paralarnı qaytarmağa tırışıp, özlerini uquq qorçalav organlarınıñ hadimleri olaraq tanıtqan belli olmağan adamlarnıñ kösterüvlerine riayet etti".
"Volgograd vilâyetinde yaşağan qadın, telefondaki dolandırıcılar tarafından hırsızlanğan paranı qaytarmağa istedi. Neticesinde o, terror faaliyetine aldanıp celp etildi", – denile beyanatta.
Mayıs ayında o, 3 million rubleden ziyade miqdarında bir qaç kredit aldı, soñra "kuratorlar"nıñ kösterüvine köre, ikonanen Qırımğa keldi, anda onı Rusiye havfsızlıq küçleri tuttılar.
FSB Canköy sakinini "Qırım köprüni patlav aqqında" yazısı içün yaqaladı
Vaqtınca işğal etilgen Canköyde FSB, içtimaiy ağlarda "Qırım köprüni patlavnı aqlağanı" içün yerli sakinniñ tutulğanını bildirdi. Rusiye qanunlarına köre, adam yedi yılğa mahküm etile bile.
RİA "Novosti Krım" bildirgenine köre, onıñ yazılarında "tilşınaslıq ekspertizası terrorizmni aqlav alâmetlerini tapqanını" bildirdiler. "İnternet vastasınen terroristik faaliyetke çağıruv, terrorizmni aqlav ya da terrorizm teşviqatı" içün oña qarşı cinaiy dava açıldı.
Bundan ğayrı, FSBniñ bildirgenine köre, daa evel tutulğan adam daa bir siyasiy sebepten açılğan "natsizm reabilitatsiyası" maddesine binaen mahküm etilgen ve umumiy rejimli müstemlekede ceza çekken.
Şimdi onı eki ayğa apiske aldılar.
"Yehova şaatları"nen alâqası bar olğanında şübhelengen Qırım sakini tutuldı
İşğal etilgen Qırımda Rusiye quvetçileri Zaprudne köyünde yaşağan 52 yaşındaki adamnı tutıp, onı Rusiyede yasaq etilgen "Yehova şaatları" diniy teşkilâtında iştirak etkeninde qabaatladılar.
FSBniñ malümatına köre, o, "Yalta ve Aluşta şeherlerinde toplaşuvlarnı idare ete, edebiyat tarqata ve Yehova Şaatlarınıñ fikirlerini teşviq ete edi". Quvetçiler tintüv vaqtında "yasaq etilgen malümat" tapqanlarını bildireler.
" Rusiyede Yehova şaatları idare merkezi" diniy teşkilâtı ve onıñ terkibine kirgen yerli diniy bölükleri yoq etildi", — bildirdiler işğalciler.
Tutulğan adamnıñ adı ve soyadı aydınlatılmay, onıñ açıq izaatları yoq.
Yalta sakini içtimaiy ağlardaki tefsirleri içün müstemlekede eki yılğa mahküm etildi
Vaqtınca işğal etilgen Yaltada Rusiye mahkemesi yerli sakinni internette bergen izaatları içün eki yılğa mahküm etti. Onı "Rusiyege qarşı laflar" ve "aşırıcılıqqa açıq çağıruvlar"nen qabaatlaylar.
Olarnıñ malümatına köre, "ukrayin kanalları"nda "rusfobik" tefsirler yazğanı, "ruslar aqqında aşağılayıcı sözler aytqanı" ve "Ukrayina Silâlı quvetleriniñ askerleriniñ areketlerine qol tutqanı" içün 45 yaşındaki adamnı qabaatladılar.
"Yalta şeer mahkemesi qabaatlanğan şahısnı qabaatlı tanıp, onı müstemlekede eki yılğa ve eki yıl devamında saytlarnı idare etüv aqqından marum etilmesine üküm etti", — dep "prokurorlıq" bildirdi.
Herson vilâyetinde işğalciler "Noman Çelebicihan adına batalyonda iştirak etkeni içün" bir adamnı mahkeme etecekler
Vaqtınca işğal etilgen Herson vilâyetinde Rusiye quvetçileri Noman Çelebicihan adına qırımtatar göñülli batalyonında iştirak etkeni içün ukrayinlerni taqip etmege devam eteler.
2016 senesi, işğalli tahqiqatnıñ versiyasına köre, adam işğal etilgen Qırımnıñ vatandaşlıq qamaçavına qoşulğan batalyonnıñ faaliyetini temin etmege yardım etken edi.
Geniçesk rayonınıñ 51 yaşındaki sakini "qanunsız silâlı birleşmede iştirak etüv"de qabaatlana.
İşğalli mahkeme bu sene mayıs ayında vaqtınca işğal etilgen Qırımda hırsızlanğan 24 yaşındaki qırımtatar Hatice Büyühçanğa "devlet hainligi"nen yañı qabaatlavnı bildirdi.
Bundan ğayrı, "Lenin rayon mahkemesi" apis müddetini 2025 senesi orta küz ayınıñ 13-ne qadar uzatmağa qarar aldı.
Hatice mayısnıñ 6-nda Eski Qırımda Simferopolğa (Aqmescitke)Rusiye imperatorlığı ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adı ketken avtobusqa minip ğayıp oldı. Tuvğanlarınıñ alğanları advokatnı oña yibermediler, bu ise qorçalav aqqınıñ bozuluvını köstere.
Telegram, WhatsApp, Facebook ve YouTube-ta Suspilne Qırım haberlerine abune oluñız
